४ सप्टेंबरला भारताचा पहिला जिओ-इमेजिंग उपग्रह झेपावणार

भारत अंतराळ क्षेत्रात आणखी एक मोठी झेप घेण्याच्या तयारीत आहे. केंद्रीय राज्यमंत्री जितेंद्र सिंह यांनी दिलेल्या माहितीनुसार, GSLV-F17/EOS-05 मिशन ४ सप्टेंबरला प्रक्षेपित करण्यात येणार आहे. त्यांनी ‘एक्स’वर पोस्ट करून याबाबत माहिती दिली. जितेंद्र सिंह यांनी ‘एक्स’वरील पोस्टमध्ये म्हटलं, “GSLV-F17/EOS-05 मिशन ४ सप्टेंबर रोजी पहाटे २ वाजून ५५ मिनिटांनी सतीश धवन अंतराळ केंद्र, SHAR, श्रीहरिकोटा येथून प्रक्षेपित करण्याचं नियोजित आहे. अधिकृत वेबसाइटवर ऑनलाइन नोंदणी करून SDSC SHAR येथील लॉन्च व्ह्यू गॅलरीमधून हे मिशन पाहता येईल.”

GSLV-F17 हे जिओसिंक्रोनस सॅटेलाइट लॉन्च व्हेईकल (GSLV)चं १९वं उड्डाण आहे. या रॉकेटमध्ये ४ मीटर व्यासाची ओगिव्ह (कम्पोझिट) प्रकारची पेलोड फेअरिंग वापरण्यात आली आहे. हे रॉकेट EOS-05 उपग्रहाला सब-जिओसिंक्रोनस ट्रान्सफर ऑर्बिटमध्ये स्थापित करणार आहे. हे प्रक्षेपण सतीश धवन अंतराळ केंद्र, SHAR येथील दुसऱ्या लॉन्च पॅडवरून (SLP) करण्यात येणार आहे.

EOS-05 उपग्रहाचं वैशिष्ट्य काय?

EOS-05 हा अत्याधुनिक अर्थ ऑब्झर्वेशन उपग्रह आहे. जिओसिंक्रोनस ऑर्बिटमधून भारताचा हा पहिला इमेजिंग उपग्रह असल्याचं सांगण्यात आलं आहे. याला GISAT-1A या नावानेही ओळखलं जातं. या उपग्रहाचं वजन २,३६७ किलोग्रॅम आहे. भारतीय उपखंडाची जवळपास रिअल-टाइम आणि हाय-रिझोल्यूशन छायाचित्रं उपलब्ध करून देणं हा या उपग्रहाचा मुख्य उद्देश आहे. आपत्ती व्यवस्थापन, कृषी क्षेत्र आणि राष्ट्रीय सुरक्षेसाठी या उपग्रहाची माहिती महत्त्वाची ठरणार आहे.

या ऐतिहासिक प्रक्षेपणाचा प्रत्यक्ष अनुभव घ्यायचा असल्यास, सतीश धवन अंतराळ केंद्रातील लॉन्च व्ह्यू गॅलरीसाठी ऑनलाइन नोंदणी करता येणार आहे. याशिवाय इस्रोच्या अधिकृत यूट्यूब चॅनेलवर ४ सप्टेंबरला पहाटे २.२५ वाजल्यापासून थेट प्रक्षेपण सुरू होणार आहे.

हे ही वाचा:

इराणविरोधातील युद्धामुळे अमेरिकेच्या क्षेपणास्त्रांचा साठा घटला

मोदींसोबत पुतिन-जिनपिंग यांची दिलखुलास भेट; शहबाज शरीफ पाहतच राहिले

उत्तराखंडमध्ये मान्यता नसलेले मदरसे होणार बंद!

“दहशतवाद कोणासाठीही रणनीतिक साधन ठरू शकत नाही”

भारतीय अंतराळ संशोधन संस्था (ISRO) यांनी सामान्य नागरिकांना रॉकेट प्रक्षेपण प्रत्यक्ष पाहता यावं यासाठी ही विशेष लॉन्च व्ह्यू गॅलरी तयार केली आहे. आंध्र प्रदेशातील श्रीहरिकोटा येथील सतीश धवन अंतराळ केंद्रात ही गॅलरी उभारण्यात आली आहे.