दहशतवाद कुणासाठीही साधन असूच शकत नाही! मोदींनी शरीफ यांना सुनावले

शांघाय कोऑपरेशन ऑर्गनायझेशनच्या (SCO) २६व्या शिखर परिषदेत पंतप्रधान नरेंद्र मोदी यांनी दहशतवादाच्या मुद्द्यावर कठोर भूमिका मांडली. किर्गिस्तानची राजधानी बिश्केक येथे सुरू असलेल्या परिषदेत पाकिस्तानचे पंतप्रधान शहबाज शरीफ आणि इतर शांघाय कोऑपरेशन ऑर्गनायझेशन सदस्य देशांचे नेते उपस्थित असताना पंतप्रधान मोदींनी दहशतवादाला कोणत्याही प्रकारे प्रोत्साहन देणाऱ्या देशांवर निशाणा साधला.

पंतप्रधान मोदी म्हणाले की, दहशतवादाच्या गंभीर मुद्द्यावर कोणत्याही प्रकारचे दुहेरी निकष स्वीकारले जाऊ शकत नाहीत. दहशतवादाविरोधात सर्व देशांनी एकत्रितपणे आणि स्पष्ट भूमिका घेण्याची गरज आहे, असं त्यांनी सांगितलं. “दहशतवादाचा वापर धोरणाचं साधन म्हणून करणाऱ्या आणि दहशतवाद्यांना आश्रय किंवा पाठिंबा देणाऱ्या देशांना ठोस संदेश दिला पाहिजे. दहशतवाद कोणासाठीही रणनीतिक साधन ठरू शकत नाही,” असं मोदींनी स्पष्ट केलं.

दहशतवादाचा संपूर्ण परिसंस्था नष्ट करण्याची गरज असल्याचंही पंतप्रधान मोदींनी अधोरेखित केलं. दहशतवाद्यांना आश्रय, समर्थन किंवा मदत देणाऱ्या घटकांविरोधात एकसंध भूमिका घेण्याचं आवाहन त्यांनी शांघाय कोऑपरेशन ऑर्गनायझेशन सदस्य देशांना केलं. विशेष म्हणजे, पाकिस्तानचे पंतप्रधान शहबाज शरीफ यांच्या उपस्थितीत मोदींनी हे वक्तव्य केलं. त्यामुळे भारताच्या दहशतवादविरोधी भूमिकेच्या दृष्टीने मोदींच्या या विधानाला विशेष महत्त्व प्राप्त झालं आहे.

हे ही वाचा:

भारताची अर्थव्यवस्था मजबूत; ‘झूठ की गूंज’ मात्र सुरूच

टाइम्स स्क्वेअरमध्ये चाकू हल्ला; पोलिसांच्या गोळीबारात आरोपी महिला ठार

भारतातील श्रीलंकन निर्वासितांच्या परतीचा मार्ग खुला

…तर पटेलांनी नेहरूंची हुकूमशाही तेव्हाच संपवली असती!

दरम्यान, शांघाय कोऑपरेशन ऑर्गनायझेशन परिषदेदरम्यान पंतप्रधान मोदींनी इराणचे राष्ट्राध्यक्ष मसूद पेझेश्कियन आणि रशियाचे राष्ट्राध्यक्ष व्लादिमीर पुतिन यांच्यासोबत द्विपक्षीय बैठका घेतल्या. या बैठकांमध्ये प्रादेशिक परिस्थिती आणि द्विपक्षीय संबंधांवर चर्चा झाली. बिश्केकमध्ये होणारी ही शांघाय कोऑपरेशन ऑर्गनायझेशनची २६वी शिखर परिषद असून, दहशतवादाविरोधातील सहकार्य, प्रादेशिक सुरक्षा आणि स्थैर्य हे या बैठकीतील महत्त्वाचे मुद्दे आहेत.