सदेचे हिवाळी अधिवेशन सुरू होण्याआधी काँग्रेस नेते राहुल गांधी हे पुन्हा देशाबाहेर चालले आहेत. संसदीय अधिवेशनाआधी विदेशावर जाण्याबाबत राहुल गांधींनी कमालीचे सातत्य दाखवले आहे. १६ ते १९ नोव्हेंबर त्यांचा अमेरिका दौरा आहे. राहुल गांधी आणि त्यांचे विदेश दौरे हे भारतीयांना न उलगडलेले गुढ आहे. केंद्र सरकारला कदाचित ते उलगडलेले असावे. अलीकडेच पंतप्रधान नरेंद्र मोदी यांनी त्याचे संकेत दिले. गुजरातेतील एका जाहीर सभेत त्यांनी या संदर्भात काही सूचक वक्तव्ये केली आहेत. मोदी हे गुढ उकलणार की फक्त पडदा उचलल्यासारखे करणार हा महत्त्वाचा प्रश्न आहे! रामलीला मैदानात इंडिया आघाडीची सभा साफ कोसळली. ४० टक्के रामलीला मैदानावर केवळ चिखल होता; उरलेल्या भागात मांडलेल्या खुर्च्याही भरल्या नव्हत्या. परंतु काँग्रेस नेत्यांनी मात्र सभेला अभूतपूर्व गर्दी लोटल्याचा दावा केला. हे दाखवायचे दात होते. प्रत्यक्षात सभेचा फ्लॉप शो झाल्यामुळे काँग्रेस नेते चवताळले आहेत. सभेला दांडी मारल्याबद्दल पक्षाध्यक्षांनी काँग्रेसच्या ८३ पदाधिकाऱ्यांना कारणे दाखवा नोटीस जारी केली आहे. युवक काँग्रेसच्या २०० पदाधिकाऱ्यांना निलंबित करण्यात आले आहे. सभा प्रचंड यशस्वी कऱण्याचे हे असले बक्षीस सर्वसामान्यांना कळण्याच्या पलिकडचे आहे.
