कॅप्टन स्मित यांच्यावरील हल्ल्याची एनआयए करणार चौकशी

फ्लाय दुबईच्या विमानात भारतीय कॅप्टन स्मित माछर यांच्यावर सहवैमानिकाने केलेल्या हल्ल्याप्रकरणी राष्ट्रीय तपास यंत्रणेने (एनआयए) गुन्हा दाखल केला आहे. ३० सप्टेंबर रोजी दुबईहून तेल अवीवला जाणाऱ्या विमानाच्या कॉकपिटमध्ये ही घटना घडली होती. या प्रकरणाचे गांभीर्य लक्षात घेऊन आता भारतीय तपास यंत्रणाही तपासात उतरली आहे.

या घटनेत ओमानचा सहवैमानिक हम्माम अल-हम्मामी याने कॉकपिटमध्ये कॅप्टन स्मित माछर यांच्यावर आपत्कालीन कुऱ्हाडीने हल्ला केल्याचा आरोप आहे. त्यानंतर विमानावरील नियंत्रण मिळवण्याचा आणि ते इस्रायलमधील बेन गुरियन विमानतळाच्या टर्मिनलवर धडकवण्याचा त्याचा कथित कट असल्याचे संयुक्त अरब अमिरातीच्या (युएइ) तपासात समोर आले आहे.

केंद्र सरकारने म्हटले आहे की, या घटनेमुळे अँटी-हायजॅकिंग कायदा, २०१६ च्या कलम ३ आणि बेकायदेशीर कृत्ये (प्रतिबंध) कायदा, १९६७ च्या कलम १६ सह कलम १५(१)(अ) अंतर्गत एका भारतीय नागरिकाविरुद्ध गुन्हे घडल्याचे उघड झाले आहे. आदेशात नमूद केलेले गुन्हे हे राष्ट्रीय तपास संस्था अधिनियम, २००८ अंतर्गत अनुसूचित गुन्हे आहेत. सरकारने म्हटले आहे की, या प्रकरणात एका भारतीय वैमानिकावरील हल्ला आणि दुबई फ्लाइट FZ1073 चे अपहरण करण्याचा किंवा ते पाडण्याचा स्पष्ट प्रयत्न यांचा समावेश आहे. या घटनेचे गंभीर राष्ट्रीय आणि आंतरराष्ट्रीय परिणाम असून, कोणताही मोठा कट उघडकीस आणण्यासाठी सखोल चौकशीची आवश्यकता आहे, असेही सरकारने म्हटले आहे. त्यामुळे केंद्र सरकारने एनआयएला गुन्हा दाखल करून एनआयए कायद्याच्या तरतुदींनुसार या प्रकरणाचा तपास करण्याचे निर्देश दिले.

राष्ट्रीय अन्वेषण संस्था अधिनियम, २००८ च्या कलम ८ सह वाचन केलेल्या कलम ६ च्या उप-कलम ५ आणि ८ अन्वये हा निर्देश जारी करण्यात आला. एनआयएच्या तपासात हल्ल्याच्या सभोवतालच्या परिस्थितीची, विमानामधील घटनांची आणि ही घटना एखाद्या मोठ्या कटाचा भाग होती का, याची तपासणी होण्याची शक्यता आहे. मात्र, सरकारी आदेशात पहिल्या अधिकाऱ्याच्या हेतूविषयी किंवा कथित हल्ल्याला कारणीभूत ठरलेल्या परिस्थितीविषयी अधिक तपशील दिलेला नाही.

हे ही वाचा:

केजरीवालांसह ममता बॅनर्जींना पोलिसांनी घेतले ताब्यात

‘कॉक्रोच’ना ताब्यात घेतल्यावर प्रवासी म्हणाले, स्वच्छ भारत अभियान

सौर वादळाचा पृथ्वीला तडाखा! भारतावर काय परिणाम?

कॉकरोचच्या आंदोलनापूर्वी ५० गुन्हेगारांसह ५०० जण ताब्यात

३० सप्टेंबर रोजी फ्लाय दुबईचे FZ1073 हे विमान दुबईहून तेल अवीवच्या दिशेने जात होते. विमान सौदी अरेबियाच्या हवाई हद्दीत असताना सहवैमानिकाने कॉकपिटमध्ये कॅप्टन स्मित यांच्यावर हल्ला केला. या हल्ल्यामुळे विमानाची उंची अल्पावधीत मोठ्या प्रमाणात घटली. मात्र, जखमी अवस्थेतही कॅप्टन मच्छर यांनी कॉकपिटचा दरवाजा उघडून मदतीसाठी इशारा दिला. त्यानंतर प्रवासी आणि कर्मचाऱ्यांनी हल्लेखोराला रोखण्यात मदत केली. विमानात उपस्थित असलेल्या अन्य दोन वैमानिकांनी परिस्थितीचा ताबा घेत विमान सौदी अरेबियातील तबुक येथे सुरक्षित उतरवले. या विमानात १७४ प्रवाशांसह कर्मचारी होते.