स्मॅटसाठी बडोद्याचा संघ जाहीर; हार्दिक पंड्याला डच्चू!

सय्यद मुश्ताक अली टी-२० ट्रॉफीसाठी बडोदा क्रिकेट संघाची घोषणा करण्यात आली आहे. अष्टपैलू कृणाल पंड्या याच्याकडे संघाच्या नेतृत्वाची जबाबदारी सोपवण्यात आली असून, त्याचा भाऊ आणि स्टार अष्टपैलू हार्दिक पंड्या याला मात्र संघात स्थान मिळालेले नाही. १४ नोव्हेंबरपासून या स्पर्धेला सुरुवात होणार आहे.

कृणालच्या नेतृत्वाखालील बडोद्याच्या संघात जितेश शर्मा, दीपक हुड्डा आणि रसिख सलाम यांसारख्या अनुभवी खेळाडूंचा समावेश करण्यात आला आहे. अतीत शेठ याच्याकडे उपकर्णधारपदाची जबाबदारी देण्यात आली आहे.

हार्दिक पंड्या आयपीएल २०२६ नंतर दुखापतींमुळे क्रिकेटपासून दूर आहे. आयपीएलदरम्यान पाठीच्या स्नायूंमध्ये ताण आल्याने त्याला विश्रांती घ्यावी लागली. त्यानंतर त्याने बंगळुरू येथील बीसीसीआय सेंटर ऑफ एक्सलन्समध्ये फिटनेस आणि पुनर्वसनावर लक्ष केंद्रित केले. त्याने अखेरचा सामना २४ मे रोजी आयपीएलमध्ये खेळला होता.

ऑक्टोबरमध्ये ऑस्ट्रेलिया ‘अ’ संघाविरुद्धच्या एकदिवसीय मालिकेसाठी त्याची इंडिया ‘अ’ संघात निवड झाली होती. मात्र, पोटरीच्या नव्या दुखापतीमुळे त्याला माघार घ्यावी लागली. दरम्यान, भारतीय कर्णधार शुभमन गिल याने हार्दिकच्या पुनरागमनाबाबत बोलताना तो आधी देशांतर्गत क्रिकेट खेळणार असल्याचे स्पष्ट केले होते. हार्दिकसारखा अष्टपैलू खेळाडू संघासाठी महत्त्वाचा असून, त्याच्या लवकर पुनरागमनाची अपेक्षा असल्याचेही गिलने सांगितले.

बडोद्याचा संघ : कृणाल पंड्या (कर्णधार), अतीत शेठ (उपकर्णधार), दीपक हुड्डा, शिवालिक शर्मा, शाश्वत रावत, अमित पासी (यष्टीरक्षक), जितेश शर्मा (यष्टीरक्षक), भानु पनिया, महेश पिठिया, परीक्षित पाटीदार, हेमंत पुंडे, राज लिम्बानी, रसिक डार, ध्रुव बी. पटेल आणि सफवान पटेल.

स्टँडबाय खेळाडू : प्रियांशु मोलिया आणि चिंतल गांधी.