युवकांचा जीव गुंतला सोन्यात

स्मिटन पल्सएआय (Smytten PulseAI) सर्वेक्षणात १८–३९ वयोगटातील ६२% युवकांनी सोन्याला दिला प्राधान्यक्रम
भारतातील तरुण पिढी आज अनेक आधुनिक गुंतवणूक पर्यायांकडे वळत असली तरी सोन्यावरील विश्वास अजूनही कायम असल्याचे एका नव्या अभ्यासातून स्पष्ट झाले आहे. स्मिटन पल्सएआयया कंपनीने देशभरातील १८ ते ३९ वयोगटातील ५,००० लोकांमध्ये केलेल्या सर्वेक्षणात ही बाब समोर आली आहे.
या सर्वेक्षणानुसार, जर एखाद्या व्यक्तीकडे आज ₹२५,००० गुंतवण्यासाठी असतील, तर ६१.९ टक्के म्हणजेच सुमारे ६२ टक्के तरुण सर्वप्रथम सोने खरेदी करण्यास प्राधान्य देतील. ही टक्केवारी म्युच्युअल फंड (१६.६%), फिक्स्ड डिपॉझिट (१३%), शेअर्स (६.६%) आणि क्रिप्टोकरन्सी (१.९%) यांच्यापेक्षा खूपच जास्त आहे. यावरून स्पष्ट होते की डिजिटल आणि आधुनिक गुंतवणूक साधने उपलब्ध असूनही सोने आजही सुरक्षित आणि विश्वासार्ह पर्याय म्हणून पाहिले जाते.
सर्वेक्षणात आणखी एक महत्त्वाची बाब समोर आली. सुमारे ६६.७ टक्के तरुणांनी सांगितले की त्यांनी सोने खरेदीचा निर्णय स्वतः घेतला होता. कुटुंबीयांचा दबाव किंवा पारंपरिक प्रथांमुळे नव्हे, तर वैयक्तिक आर्थिक नियोजनाचा भाग म्हणून त्यांनी ही गुंतवणूक केली.
हे ही वाचा:
‘टीव्हीएस’ ‘बजाज’ दुचाकी बाजारातील ‘हिरो’

अमेरिकेत भारतीय विद्यार्थ्याचा मृतदेह सापडला

यामुळे आजची युवा पिढी आर्थिकदृष्ट्या अधिक स्वावलंबी आणि निर्णयक्षम होत असल्याचे दिसून येते.
खरेदीच्या पद्धतीतही बदल दिसून आला आहे. मोठ्या प्रमाणात एकदाच सोने खरेदी करण्याऐवजी लहान प्रमाणात आणि वारंवार खरेदी करण्याकडे कल वाढला आहे. सुमारे ६१.९ टक्के तरुणांची अलीकडील खरेदी ५ ग्रॅमपेक्षा कमी होती. त्यापैकी २७.५ टक्क्यांनी २ ग्रॅमपेक्षा कमी, तर ३४.४ टक्क्यांनी २ ते ५ ग्रॅम सोने खरेदी केले. हे दर्शवते की सोने आता बचत आणि नियमित गुंतवणुकीचा भाग बनले आहे.
आर्थिक अस्थिरतेच्या काळातही सोने अधिक सुरक्षित वाटते, असे ६५.७ टक्के तरुणांनी नमूद केले. बँक बचत, म्युच्युअल फंड किंवा शेअर्सपेक्षा सोने अधिक स्थिर आणि विश्वासार्ह असल्याची भावना त्यांच्यात आहे.
पहिल्या पगारानंतरच सोने खरेदी करण्याची प्रवृत्तीही वाढताना दिसते. सुमारे २४.३ टक्के तरुणांनी पहिल्या पगारानंतर सोने घेतल्याचे सांगितले, तर २३.९ टक्क्यांनी गुंतवणुकीच्या दृष्टीने सोने खरेदी केले.
खरेदीच्या ठिकाणांबाबत पाहता, ३८ टक्के तरुणांनी मोठ्या ब्रँडेड ज्वेलरी चेनची निवड केली. ३४.७ टक्के लोकांनी स्थानिक ज्वेलर्सकडून खरेदी केली, तर केवळ ५ टक्क्यांनी ऑनलाइन प्लॅटफॉर्मचा वापर केला. ऑनलाइन खरेदीबाबत शुद्धता आणि विश्वासार्हतेची चिंता अद्याप कायम आहे.
एकूणच, आधुनिक गुंतवणूक पर्याय उपलब्ध असूनही भारतीय तरुण आजही सोन्यावर विश्वास ठेवतात. सुरक्षितता, स्थिरता आणि लिक्विडिटी या कारणांमुळे सोने त्यांच्या गुंतवणूक यादीत सर्वात वरचे स्थान कायम राखत आहे.