दिल्लीतील ७०० कोटींच्या घोटाळ्यातील मुख्य संशयित देशाबाहेर पसार

दिल्लीतील सुमारे ७०० कोटी रुपयांच्या वैद्यकीय खरेदी घोटाळ्याला नवे वळण मिळाले असून, या प्रकरणातील प्रमुख संशयित फार्मास्युटिकल व्यापारी राजीव रंगीला तपास यंत्रणांच्या हाती लागण्यापूर्वीच देशाबाहेर गेल्याचा आरोप आहे. दिल्ली लाचलुचपत प्रतिबंधक शाखेच्या (ACB) तपासानुसार, ३० जून २०२६ रोजी दुसऱ्या एका प्रकरणात त्याला अटकपूर्व जामीन मिळाल्यानंतर काही दिवसांतच त्याने भारत सोडला. मात्र, ज्या प्रकरणात त्याला जामीन मिळाला, त्याचा या वैद्यकीय खरेदी घोटाळ्याशी थेट संबंध नसल्याचे तपास यंत्रणेने स्पष्ट केले आहे.

दिल्ली सरकारच्या रुग्णालयांसाठी औषधे, लसी, वैद्यकीय उपकरणे आणि शस्त्रक्रियेसाठी लागणाऱ्या साहित्याच्या खरेदीमध्ये मोठ्या प्रमाणावर अनियमितता झाल्याचा आरोप आहे. केंद्रीय खरेदी संस्थेच्या (CPA) निविदा प्रक्रियेत कथित फेरफार करून काही ठरावीक कंपन्यांना फायदा मिळवून देण्यात आल्याचा तपास यंत्रणांचा दावा आहे. निविदांच्या अटी अशा पद्धतीने तयार करण्यात आल्या की, इतर पात्र कंपन्यांना स्पर्धेतून दूर ठेवता येईल, असा संशय व्यक्त करण्यात आला आहे.
हे ही वाचा:
सणासुदीपूर्वी सोन्या-चांदीच्या दरवाढीने ग्राहकांची चिंता वाढली

दहशतवादाविरोधात पोलंड भारतासोबत!

तपासात काही शेल कंपन्यांच्या माध्यमातून वैद्यकीय उपकरण उत्पादकांशी संगनमत केल्याचेही समोर आले आहे. निविदा प्रक्रिया सुरू होण्यापूर्वीच काही वस्तूंचे दर निश्चित करून त्यानुसार सरकारी खरेदी करण्यात आली आणि त्यातून कमिशन किंवा लाचेच्या स्वरूपात पैशांची देवाणघेवाण झाल्याचा आरोप आहे. काही वैद्यकीय उपकरणे आणि साहित्य बाजारभावापेक्षा २०० ते ५०० टक्क्यांपर्यंत अधिक किमतीत खरेदी करण्यात आल्याचा ACB चा दावा आहे.

या प्रकरणाचा तपास मे २०२६मध्ये सुरू झाला. त्यानंतर २ जून रोजी एफआयआर दाखल करण्यात आला. १८ जूनला पहिली अटक करण्यात आली. आतापर्यंत दिल्लीच्या आरोग्य विभागाशी संबंधित तीन वरिष्ठ अधिकाऱ्यांना अटक झाल्याचे वृत्त आहे. यामध्ये माजी आरोग्य सेवा महासंचालक डॉ. वत्सला अग्रवाल, माजी CPA उपनियंत्रक लेखा अधिकारी नीरज चोप्रा आणि माजी CPA कार्यालयप्रमुख डॉ. विनोद कुमार रंगा यांचा समावेश आहे.

या प्रकरणात सरकारी खरेदीशी संबंधित काही महत्त्वाची कागदपत्रे गायब असल्याचेही तपास यंत्रणेने न्यायालयात सांगितले आहे. त्यामुळे संपूर्ण व्यवहाराचा माग काढण्याचे आव्हान वाढले आहे. दरम्यान, चौकशीसाठी नोटिसा बजावल्यानंतरही राजीव रंगीला हजर झाला नसल्याचा आरोप आहे. त्याच्याशी संबंधित ठिकाणी शोधमोहीम राबवण्यात आली असून, त्याच्या प्रवासाचा आणि आर्थिक व्यवहारांचा तपास सुरू आहे. त्याच्याविरोधात लूकआउट सर्क्युलर जारी करण्याची शक्यताही तपासली जात आहे.