इराण-इस्रायल संघर्षामुळे जागतिक पुरवठा साखळीवर मोठा परिणाम झाला असून त्याचा फटका आता भारतातील शीतपेय बाजारालाही बसू लागला आहे. विशेषतः डाएट कोकच्या उत्पादनासाठी आवश्यक असलेल्या ॲल्युमिनियम कॅन्सचा पुरवठा विस्कळीत झाल्याने कोका-कोला कंपनीने भारतात डाएट कोकच्या किमतीत १० टक्क्यांहून अधिक वाढ केली आहे. पुरवठ्यातील अडचणींमुळे कंपनीला दक्षिण-पूर्व आशियातून अधिक महागडे ३३० मि.ली. कॅन्स आयात करावे लागत असून त्याचा अतिरिक्त खर्च ग्राहकांच्या खिशावर पडत आहे.
यापूर्वी भारतात ३०० मि.ली.चा डाएट कोक कॅन ₹४० ला उपलब्ध होता. आता त्याऐवजी ३३० मि.ली.चा कॅन ₹५० मध्ये विकला जात आहे. त्यामुळे प्रतिमिलिलिटर दराच्या हिशोबाने किंमत सुमारे १३.६ टक्क्यांनी वाढली आहे. कंपनीने या बदलाची अधिकृत घोषणा केलेली नसली तरी बाजारात नव्या दराने विक्री सुरू झाली आहे.
हे ही वाचा:
फिफा वर्ल्डकप स्टार वोजिन्हा चिलीच्या ‘कोलो कोलो’ क्लबशी करारबद्ध
सोन्याला पुन्हा झळाळी; चांदीचीही दमदार उसळी
…हे होते धर्मेंद्र प्रधान यांनी राजीनामा देताना विद्यार्थ्यांना लिहिलेले पत्र
या दरवाढीमागील प्रमुख कारण म्हणजे होर्मुझ सामुद्रधुनीमार्गे होणाऱ्या ॲल्युमिनियम कॅन्स आणि संबंधित कच्च्या मालाच्या वाहतुकीवर झालेला परिणाम. संघर्षामुळे या महत्त्वाच्या सागरी मार्गावरील वाहतूक मोठ्या प्रमाणात विस्कळीत झाली असून जागतिक कंपन्यांना पर्यायी पुरवठा साखळीचा अवलंब करावा लागत आहे. त्यातून वाहतूक आणि उत्पादन खर्चात वाढ झाली आहे. भारतात डाएट कोकची विक्री प्रामुख्याने ॲल्युमिनियम कॅन्समध्ये होत असल्याने या उत्पादनावर सर्वाधिक परिणाम झाला आहे. दुसरीकडे, कोक झिरो हे पेय प्लास्टिकच्या बाटल्या आणि कॅन्स अशा दोन्ही स्वरूपात उपलब्ध असल्याने त्याच्या पुरवठ्यावर फारसा परिणाम झालेला नाही.
कॅन्सच्या टंचाईमुळे काही भागांत मर्यादित प्रमाणात २०० मि.ली. काचेच्या बाटल्यांमध्ये डाएट कोक उपलब्ध करून देण्याचाही प्रयत्न सुरू आहे. मात्र काचेच्या बाटल्यांचा खर्च तुलनेने अधिक असल्याने हा पर्यायही महाग ठरत आहे. तज्ज्ञांच्या मते, इराण-इस्रायल संघर्षामुळे केवळ इंधन किंवा ऊर्जा क्षेत्रच नव्हे, तर दैनंदिन वापरातील वस्तू, खाद्यपदार्थ आणि पेय उद्योगावरही परिणाम होत आहे. पुरवठा साखळीतील अडथळे कायम राहिल्यास भविष्यात आणखी काही ग्राहक उत्पादनांच्या किमती वाढण्याची शक्यता नाकारता येत नाही.
