डॉलरच्या मजबुतीमुळे सोन्याची चमक फिकी; चांदीही घसरली

जागतिक बाजारातील कमजोर संकेत आणि डॉलरच्या मजबुतीचा परिणाम सोमवारी (७ सप्टेंबर) सोने-चांदीच्या दरावर दिसून आला. भारतीय बाजारात दोन्ही मौल्यवान धातूंच्या दरात सुमारे ०.३ टक्क्यांची घसरण झाली. सोन्याचा दर १.५२ लाख रुपये प्रति १० ग्रॅमच्या आसपास, तर चांदीचा दर २.३७ लाख रुपयांवरून घसरून २.३६ लाख रुपये प्रति किलोच्या आसपास आला.

मल्टी कमोडिटी एक्सचेंजवर (एमसीएक्स) ५ ऑक्टोबर २०२६ रोजी मुदत संपणारा सोन्याचा करार मागील १,५२,७६७ रुपयांच्या तुलनेत १,५२,२७९ रुपये प्रति १० ग्रॅमवर खुला झाला. सकाळी १० वाजता सोने ४०९ रुपयांनी म्हणजेच ०.२७ टक्क्यांनी घसरून १,५२,३५८ रुपये प्रति १० ग्रॅमवर व्यवहार करत होते. आतापर्यंतच्या व्यवहारात सोन्याने १,५२,२२५ रुपयांचा नीचांकी आणि १,५२,४८३ रुपयांचा उच्चांकी स्तर गाठला.

चांदीच्या दरातही घसरण झाली. ४ डिसेंबर २०२६ रोजी मुदत संपणारा चांदीचा करार मागील २,३७,६५८ रुपयांच्या तुलनेत २,३७,१७६ रुपये प्रति किलोवर खुला झाला. सकाळी १० वाजता चांदी ६७३ रुपयांनी म्हणजेच ०.२८ टक्क्यांनी घसरून २,३६,९८५ रुपये प्रति किलोवर व्यवहार करत होती. व्यवहारादरम्यान चांदीने २,३६,४२३ रुपयांचा नीचांकी, तर २,३७,६५८ रुपयांचा उच्चांकी स्तर गाठला. आंतरराष्ट्रीय बाजारातही मौल्यवान धातूंवर दबाव कायम राहिला. सोन्याचा दर ०.६२ टक्क्यांनी घसरून ४,४५० डॉलर प्रति औंस, तर चांदीचा दर ०.५६ टक्क्यांनी घसरून ६६ डॉलर प्रति औंसवर आला.

हे ही वाचा:

समाजशास्त्र-मानववंशशास्त्र क्षेत्रातील ज्येष्ठ अभ्यासक शोभिता जैन यांचे निधन

एमपीएससी पेपरफुटीविरोधात विद्यार्थ्यांचा आक्रोश मोर्चा

“भारताला जितके तेल हवे, तितके देण्यास रशिया तयार”

अमेरिकेत अमेझॉनच्या कार्गो विमानाचा अपघात; ५ जणांचा मृत्यू

तज्ज्ञांच्या मते, अमेरिकेतील रोजगाराची मजबूत आकडेवारी बाजारासाठी महत्त्वाची ठरली आहे. या आकडेवारीमुळे अमेरिकेच्या मध्यवर्ती बँकेकडून आगामी बैठकीत व्याजदर वाढवण्याची शक्यता बळावली आहे. त्यामुळे सोन्या-चांदीसारख्या मौल्यवान धातूंवर दबाव वाढला आहे. याशिवाय डॉलरच्या निर्देशांकात झालेली वाढही सोने-चांदीसाठी नकारात्मक ठरत आहे. सध्या डॉलरचा निर्देशांक ९९च्या आसपास व्यवहार करत असून, डॉलर मजबूत झाल्याने मौल्यवान धातूंच्या दरावर आणखी दबाव निर्माण झाला आहे.