सोन्या-चांदीच्या दरात पुन्हा घसरण

सणासुदीच्या काळात सोने-चांदी खरेदी करण्याचा विचार करणाऱ्यांसाठी महत्त्वाची बातमी आहे. शनिवारी, ५ सप्टेंबर २०२६ रोजी भारतीय सराफा बाजारात सोन्या-चांदीच्या दरात बदल झाला असून, सोन्याच्या दरात घसरण झाल्याने ग्राहकांना काहीसा दिलासा मिळाला आहे. गेल्या काही काळापासून सोन्याच्या किमती सातत्याने उच्च पातळीवर असल्याने सामान्य ग्राहकांच्या खरेदीवर त्याचा मोठा परिणाम झाला आहे. मात्र, आजच्या दरातील बदलामुळे आगामी सणासुदीच्या खरेदीकडे ग्राहकांचे लक्ष पुन्हा वळण्याची शक्यता आहे.

आज २४ कॅरेट सोन्याचा १० ग्रॅमचा दर १ लाख ५३ हजार ०४० रुपये, तर २२ कॅरेट सोन्याचा १० ग्रॅमचा दर १ लाख ४० हजार २८७ रुपये इतका आहे. दुसरीकडे, चांदीचा दर प्रतिकिलो २ लाख ३६ हजार ७०० रुपये नोंदवला गेला आहे. सोन्या-चांदीच्या किमतींमध्ये गेल्या काही दिवसांपासून चढ-उतार सुरू असून, जागतिक बाजारातील हालचालींचा त्यावर परिणाम होत आहे.
हे ही वाचा:
खार्ग बेटाजवळ इराणी तेलवाहू जहाजावर क्षेपणास्त्र हल्ला

दिल्लीत रिपब्लिक चॅनेलच्या महिला पत्रकाराशी ‘कॉक्रोच’चे गैरवर्तन

दरम्यान, ग्राहकांनी केवळ बाजारातील सोन्याचा दर पाहून खरेदीचा निर्णय घेऊ नये. दागिन्यांच्या अंतिम किमतीमध्ये जीएसटी, मेकिंग चार्ज आणि इतर शुल्कांचा समावेश होतो. २४ कॅरेट सोने सुमारे ९९.९ टक्के शुद्ध असते, तर २२ कॅरेट सोन्यात इतर धातू मिसळलेले असल्याने ते दागिने बनवण्यासाठी अधिक वापरले जाते. त्यामुळे खरेदीपूर्वी शुद्धता, वजन आणि अंतिम बिलाची किंमत तपासणे महत्त्वाचे ठरणार आहे.