मारुती सुझुकीची विक्री ऐतिहासिक उच्चांकावर

देशातील सर्वात मोठी कार उत्पादक कंपनी असलेल्या मारुती सुझुकीने ऑक्टोबर २०२६ मध्ये वाहन विक्रीचा ऐतिहासिक उच्चांक नोंदवला आहे. कंपनीने या महिन्यात तब्बल २ लाख ७६ हजार १२० वाहनांची विक्री केली असून, गेल्या वर्षीच्या ऑक्टोबर महिन्यातील २ लाख २० हजार ८९४ वाहनांच्या तुलनेत विक्रीत २५ टक्क्यांची वाढ झाली आहे. कंपनीच्या इतिहासातील ही आतापर्यंतची सर्वाधिक मासिक विक्री ठरली आहे. विशेष म्हणजे, दिवाळी आणि सणासुदीच्या काळात ग्राहकांकडून वाहन खरेदीला मिळालेला प्रतिसाद या विक्रमी कामगिरीमागील प्रमुख कारण मानले जात आहे.

देशांतर्गत बाजारपेठेतही मारुती सुझुकीची कामगिरी दमदार राहिली. ऑक्टोबरमध्ये कंपनीने देशांतर्गत बाजारात २ लाख १६ हजार ७८९ वाहनांची विक्री केली. यामध्ये प्रवासी कार आणि युटिलिटी वाहनांना चांगली मागणी मिळाली. ब्रेझा, एर्टिगा, फ्रॉन्क्स आणि ग्रँड विटारा यांसारख्या एसयूव्ही वाहनांची विक्री २६ टक्क्यांनी वाढून ९७ हजार ७८७ वाहनांवर पोहोचली. तर मिनी, कॉम्पॅक्ट आणि मध्यम आकाराच्या कारची विक्री १८ टक्क्यांनी वाढून १ लाख ८७७ वाहनांवर पोहोचली. यावरून भारतीय ग्राहकांमध्ये एसयूव्हीबरोबरच लहान आणि मध्यम आकाराच्या कारची मागणीही कायम असल्याचे स्पष्ट होते.
हे ही वाचा:
जीएसटी महसुलात ऑक्टोबरमध्ये २.३१ लाख कोटींचे विक्रमी संकलन

बिनान्सकडून ६.३ अब्ज डॉलरच्या चोरीतील ९५% नुकसान भरून काढले

दरम्यान, निर्यातीच्या आघाडीवरही कंपनीने मोठी झेप घेतली आहे. ऑक्टोबरमध्ये मारुती सुझुकीने ४९ हजार ८७२ वाहनांची निर्यात केली. गेल्या वर्षी याच महिन्यात ३१ हजार ३०४ वाहनांची निर्यात झाली होती. म्हणजेच निर्यातीत तब्बल ५९ टक्क्यांची वाढ झाली आहे. देशांतर्गत बाजारपेठेतील वाढती मागणी आणि आंतरराष्ट्रीय बाजारातील विस्तार यामुळे कंपनीच्या विक्रीला दुहेरी बळ मिळाले आहे. ऑक्टोबरमधील ही विक्रमी कामगिरी भारतीय वाहन उद्योगातील वाढत्या ग्राहक मागणीचे संकेत देणारी ठरली आहे.