तेल स्वस्त, बाजार मस्त! सेन्सेक्स ७९ हजारांच्या उंबरठ्यावर

जागतिक बाजारात कच्च्या तेलाच्या किमतीत झालेल्या मोठ्या घसरणीचा सकारात्मक परिणाम सोमवारी (३ ऑगस्ट) भारतीय शेअर बाजारावर दिसून आला. आठवड्याच्या पहिल्याच व्यवहारात गुंतवणूकदारांकडून जोरदार खरेदी झाल्याने सेन्सेक्स आणि निफ्टी दोन्ही निर्देशांक तेजीसह व्यवहार करत होते. सकाळच्या सत्रात सेन्सेक्स ७८८.७० अंकांनी (१.०१ टक्के) वाढून ७८,८८३.३४ वर पोहोचला. तर निफ्टी १८९.१० अंकांनी (०.७८ टक्के) वधारत २४,५७२.७० वर व्यवहार करत होता. या तेजीमुळे सेन्सेक्स पुन्हा एकदा ७९ हजारांच्या पातळीच्या अगदी जवळ पोहोचला आहे.

आजच्या व्यवहारात धातू (मेटल) आणि एफएमसीजी क्षेत्रातील समभागांमध्ये सर्वाधिक खरेदी झाली. निफ्टी मेटल आणि निफ्टी एफएमसीजी निर्देशांक आघाडीवर राहिले. याशिवाय पीएसयू बँक, कमोडिटीज, आयटी, ऑटो, इन्फ्रा, सर्व्हिसेस, इंडिया डिफेन्स आणि ऑइल अँड गॅस क्षेत्रातील निर्देशांकांमध्येही चांगली वाढ नोंदवली गेली. मात्र, हेल्थकेअर, फार्मा आणि मीडिया क्षेत्रातील समभागांमध्ये काही प्रमाणात विक्रीचा दबाव दिसून आला. त्यामुळे हे तीनही निर्देशांक घसरणीसह व्यवहार करत होते.

मोठ्या कंपन्यांबरोबरच मध्यम आणि लघु कंपन्यांच्या समभागांमध्येही गुंतवणूकदारांचा उत्साह दिसून आला. निफ्टी मिडकॅप १०० निर्देशांक २७४ अंकांनी (०.४४ टक्के) वाढून ६२,१८१ वर पोहोचला. तर निफ्टी स्मॉलकॅप १०० निर्देशांक १६४ अंकांनी (०.८५ टक्के) वाढून १९,५१३ वर व्यवहार करत होता.

सेन्सेक्समधील इंडिगो, आयटीसी, बजाज फायनान्स, बजाज फिनसर्व्ह, टीसीएस, इन्फोसिस, एलअँडटी, महिंद्रा अँड महिंद्रा, कोटक महिंद्रा बँक, टाटा स्टील, बीईएल, हिंदुस्तान युनिलिव्हर, पॉवर ग्रिड, ट्रेंट, अदानी पोर्ट्स, एनटीपीसी, एचडीएफसी बँक, आयसीआयसीआय बँक आणि एचसीएल टेक या समभागांनी चांगली कामगिरी केली. तर सन फार्मा, मारुती सुझुकी आणि भारती एअरटेलच्या समभागांमध्ये घसरण झाली.

बाजारातील या तेजीमागे जागतिक घडामोडींचा मोठा प्रभाव असल्याचे तज्ज्ञांचे मत आहे. अमेरिकेचे राष्ट्राध्यक्ष डोनाल्ड ट्रम्प यांनी इराणवरील हल्ले थांबवण्याची घोषणा केल्यानंतर जागतिक बाजारात कच्च्या तेलाच्या किमतीत मोठी घसरण झाली. वृत्त लिहिताना ब्रेंट क्रूडची किंमत सुमारे ५ टक्क्यांनी घसरून प्रति बॅरल ८३.६६ डॉलर, तर डब्ल्यूटीआय क्रूड ५.५० टक्क्यांनी घसरून प्रति बॅरल ८०.०२ डॉलर इतकी होती.

हे ही वाचा:

मोदींना शिवीगाळ करणाऱ्या ‘त्या’ १५ वर्षीय मुलीविरुद्ध गुन्हा नाही

‘तन्वी भारताची पुढची सुपरस्टार’

आषाढी वारीत एसटीला ₹४१.१८ कोटींचे उत्पन्न

अन्नसुरक्षेच्या नियमांमध्ये कोणालाही सूट नाही

दरम्यान, आशियातील बहुतांश शेअर बाजारांमध्ये मात्र कमकुवत वातावरण दिसून आले. टोकियो, शांघाय, बँकॉक, सोल आणि जकार्ता येथील बाजार घसरणीसह व्यवहार करत होते. दुसरीकडे, शुक्रवारी अमेरिकेतील शेअर बाजार तेजीत बंद झाले होते. डाऊ जोन्स निर्देशांक ०.५३ टक्क्यांनी, तर तंत्रज्ञान क्षेत्रातील नॅस्डॅक निर्देशांक जवळपास १ टक्क्यांनी वधारून बंद झाला होता.