ब्लिंकिट, स्विगी इन्स्टामार्टसह मोठ्या विक्रेत्यांकडून साखर खरेदीवर मर्यादा

देशात साखरेच्या पुरवठ्यावर वाढता ताण आणि दरवाढीच्या पार्श्वभूमीवर ब्लिंकिट, स्विगी इन्स्टामार्ट, बिगबास्केटसह काही मोठ्या किरकोळ विक्रेत्यांनी साखरेच्या विक्रीवर मर्यादा घालण्यास सुरुवात केली आहे. सणासुदीच्या काळात साखरेची मागणी वाढण्याची शक्यता असतानाच बाजारात उपलब्ध साठा कमी पडत असल्याने ग्राहकांना एका वेळी ठरावीक प्रमाणातच साखर खरेदी करता येत आहे. त्यामुळे भविष्यात साखरेच्या किमती आणखी वाढणार का, याबाबतही चिंता व्यक्त केली जात आहे.

गेल्या दोन महिन्यांत किरकोळ बाजारातील साखरेच्या दरात सुमारे ४० टक्क्यांची वाढ झाली आहे. उत्पादन अपेक्षेपेक्षा कमी राहणे, देशांतर्गत मागणी वाढणे आणि पुरवठ्यावर आलेला दबाव यामुळे दरवाढीची परिस्थिती निर्माण झाली. जूनच्या सुरुवातीला मिल-स्तरावर साखरेचा दर सुमारे ४१ रुपये किलो होता. तो वाढत ६५ रुपयांपर्यंत पोहोचला. त्यानंतर सरकारी हस्तक्षेपामुळे दर काही प्रमाणात खाली येऊन सध्या सुमारे ५८ रुपये किलोच्या आसपास असल्याचे सांगितले जाते.
हे ही वाचा:
संदेशखालीतील ईडी हल्ला प्रकरणातील मिथू सरदारला अंड्यांचा प्रसाद

भारत म्हणजे धर्मशाळा नव्हे!

दर नियंत्रणात आणण्यासाठी केंद्र सरकारने १० लाख टन साखर आयात करण्यास परवानगी दिली आहे. यापूर्वी अतिरिक्त साठा उपलब्ध असल्याच्या अंदाजावर २० लाख टन साखर निर्यातीला परवानगी देण्यात आली होती. मात्र देशांतर्गत बाजारात दर वाढल्यानंतर मे महिन्यात निर्यातीवर निर्बंध आणण्यात आले.

पुरवठा मर्यादित असल्याने अनेक प्लॅटफॉर्मवर ग्राहकांसाठी खरेदीची कमाल मर्यादा निश्चित करण्यात आली आहे. काही ठिकाणी २ ते ५ किलोपर्यंतच साखर खरेदी करता येत आहे. या निर्णयामागे साठेबाजी रोखणे आणि उपलब्ध साखर अधिकाधिक ग्राहकांपर्यंत पोहोचवणे हा उद्देश असल्याचे मानले जाते.

साखरेच्या दरवाढीचा परिणाम खाद्यपदार्थ उद्योगावरही होण्याची शक्यता आहे. बिस्किटे, मिठाई, स्नॅक्स आणि इतर प्रक्रिया केलेल्या खाद्यपदार्थांच्या उत्पादन खर्चात वाढ होऊ शकते. त्यामुळे कंपन्यांकडून उत्पादनांच्या किमतीत वाढ करण्याची शक्यता आहे. सरकारच्या आयातीमुळे बाजारातील पुरवठा सुधारतो का आणि साखरेचे दर पुन्हा नियंत्रणात येतात का, याकडे आता ग्राहक आणि उद्योग क्षेत्राचे लक्ष लागले आहे.