जिओ प्लॅटफॉर्म्सच्या आयपीओचा प्राइस बँड निश्चित!

भारतीय शेअर बाजारातील बहुप्रतीक्षित जिओ प्लॅटफॉर्म्सच्या आयपीओची (IPO) चर्चा आता निर्णायक टप्प्यावर पोहोचली आहे. उद्योगपती मुकेश अंबानी यांच्या नेतृत्वाखालील रिलायन्स इंडस्ट्रीज समूहाची डिजिटल आणि दूरसंचार क्षेत्रातील महत्त्वाची कंपनी असलेल्या जिओ प्लॅटफॉर्म्सने आयपीओसाठी प्रति शेअर १,०६५ ते १,११९ रुपये असा किंमत पट्टा निश्चित केल्याचे वृत्त समोर आले आहे. या सार्वजनिक समभाग विक्रीतून कंपनीला कमाल ३०,२१३ कोटी रुपये उभारता येऊ शकतात. हा इश्यू अपेक्षेप्रमाणे पूर्ण झाल्यास भारतीय शेअर बाजाराच्या इतिहासातील सर्वात मोठा आयपीओ ठरण्याची शक्यता आहे. त्यामुळे २०२४ मध्ये सुमारे २७,८५९ कोटी रुपयांचा आयपीओ आणणाऱ्या ह्युंदाई मोटर इंडियाचा विक्रमही मागे पडू शकतो.

या आयपीओअंतर्गत कंपनी सुमारे २७ कोटी नवीन इक्विटी शेअर्स जारी करण्याची योजना आखत आहे. हा पूर्णपणे नवीन शेअर्सचा इश्यू असेल. म्हणजेच, सध्याचे गुंतवणूकदार आपले शेअर्स विकणार नसून, आयपीओतून मिळणारा निधी थेट कंपनीकडे जमा होईल. कंपनीचे संभाव्य मूल्यांकन सुमारे १०.३ लाख कोटी रुपये म्हणजेच १०६ अब्ज डॉलरपर्यंत पोहोचण्याचा अंदाज आहे. यापूर्वी जिओच्या मूल्यांकनाबाबत १३० अब्ज डॉलरपेक्षा अधिक अपेक्षा व्यक्त करण्यात आल्या होत्या. मात्र, शेअर बाजारातील घसरण आणि जागतिक आर्थिक परिस्थितीतील अनिश्चिततेमुळे मूल्यांकनाच्या अपेक्षांमध्ये बदल झाल्याचे वृत्त आहे.
हे ही वाचा:
अमेरिकेचे व्हिसा निर्बंध भारतासाठी सुवर्णसंधी

कॉकरोचच्या आंदोलनापूर्वी ५० गुन्हेगारांसह ५०० जण ताब्यात

जिओच्या आयपीओतून उभारल्या जाणाऱ्या निधीचा मोठा हिस्सा रिलायन्स जिओ इन्फोकॉम या दूरसंचार उपकंपनीचे कर्ज फेडण्यासाठी वापरण्याची कंपनीची योजना आहे. यासाठी सुमारे २७,५०० कोटी रुपयांपर्यंतचा निधी वापरला जाऊ शकतो. उर्वरित रक्कम सर्वसाधारण कॉर्पोरेट उद्देशांसाठी वापरण्यात येईल. जिओ प्लॅटफॉर्म्सच्या व्यवसायात मोबाइल सेवा, ब्रॉडबँड, क्लाउड, डिजिटल मनोरंजन, एंटरप्राइज तंत्रज्ञान आणि कृत्रिम बुद्धिमत्ता यांसारख्या क्षेत्रांचा समावेश आहे. मार्च २०२६ अखेर कंपनीच्या दूरसंचार सेवेला सुमारे ५२.४४ कोटी ग्राहक होते. आर्थिक वर्ष २०२५-२६ मध्ये कंपनीचा महसूल सुमारे १.४७ लाख कोटी रुपये, तर निव्वळ नफा सुमारे ३०,०५० कोटी रुपये नोंदवण्यात आला. त्यामुळे दूरसंचार व्यवसायासोबतच डिजिटल सेवांमधील वाढीकडेही गुंतवणूकदारांचे लक्ष असेल.

दरम्यान, उपलब्ध वृत्तांनुसार, अँकर गुंतवणूकदारांसाठी १९ ऑक्टोबरपासून बोली प्रक्रिया सुरू होण्याची, तर सर्वसामान्य गुंतवणूकदारांसाठी २१ ते २३ ऑक्टोबरदरम्यान आयपीओ खुला राहण्याची शक्यता आहे. २८ ऑक्टोबर रोजी शेअर्सची शेअर बाजारात नोंदणी होण्याचा अंदाज व्यक्त करण्यात आला आहे. मात्र, या तारखा आणि इतर तपशील अंतिम अधिकृत घोषणेनुसार निश्चित होतील. जिओचा आयपीओ हा केवळ रिलायन्स समूहासाठीच नव्हे, तर संपूर्ण भारतीय भांडवली बाजारासाठी महत्त्वाचा टप्पा ठरू शकतो. विक्रमी आकाराचा हा इश्यू गुंतवणूकदारांकडून किती प्रतिसाद मिळवतो आणि कंपनीचे अपेक्षित मूल्यांकन बाजार स्वीकारतो का, याकडे आता आर्थिक क्षेत्राचे लक्ष लागले आहे.