जागतिक वाहन उद्योगात मोठी उलथापालथ घडवणारी बातमी समोर आली आहे. जर्मनीची दिग्गज वाहननिर्माता कंपनी फॉक्सवॅगन आपल्या इतिहासातील सर्वात मोठ्या पुनर्रचनेच्या तयारीत असून, तब्बल १ लाख कर्मचाऱ्यांची कपात करण्याचा विचार सुरू आहे. यासोबतच जर्मनीतील चार प्रमुख उत्पादन प्रकल्प बंद करण्याचाही प्रस्ताव चर्चेत आहे. कंपनीच्या मुख्य कार्यकारी अधिकारी ऑलिव्हर ब्लूम यांच्या नेतृत्वाखाली खर्चात मोठी कपात करून कंपनी पुन्हा स्पर्धात्मक बनवण्याचा हा प्रयत्न असल्याचे मानले जात आहे.
हे ही वाचा:
घुसखोरीच्या प्रयत्नात असलेला पाकव्याप्त काश्मीरातील २६ वर्षीय तरुण ताब्यात
रशिया-युक्रेनमध्ये १६०-१६० युद्धकैद्यांची अदलाबदल
शोएब अख्तरच्या भावाच्या अंत्यसंस्काराला दहशतवाद्यांची गर्दी
कतारमधील रास लफ्फान दुर्घटनेतील मृत भारतीयांचे पार्थिव भारतात रवाना
गेल्या काही वर्षांत फॉक्सवॅगनसमोर अनेक मोठी आव्हाने उभी राहिली आहेत. इलेक्ट्रिक वाहनांच्या बाजारात चीनच्या BYDसारख्या कंपन्यांनी आक्रमक विस्तार केल्याने व्होक्सवॅगनचा बाजारातील हिस्सा झपाट्याने कमी झाला आहे. त्यातच युरोपमधील वाहनांची घटती मागणी, वाढलेला उत्पादन खर्च, महागाई, ऊर्जा खर्च आणि अमेरिकेच्या आयात शुल्काच्या धोरणामुळे कंपनीच्या नफ्यावर मोठा दबाव निर्माण झाला आहे. परिणामी, कंपनीने खर्च नियंत्रणासाठी कठोर पावले उचलण्याचा निर्णय घेतला आहे.
याआधी फॉक्सवॅगनने २०३० पर्यंत ५० हजार कर्मचाऱ्यांची कपात करण्याची घोषणा केली होती. मात्र नव्या योजनेनुसार ही संख्या थेट १ लाखांपर्यंत जाऊ शकते. तसेच हॅनोव्हर, झ्विकाऊ, एम्डेन आणि ऑडीचा नेकार्सुल्म कारखाना टप्प्याटप्प्याने बंद करण्याचाही विचार सुरू असल्याचे वृत्त आहे. या निर्णयामुळे केवळ हजारो कर्मचाऱ्यांवर परिणाम होणार नाही, तर पुरवठादार, लघुउद्योग आणि स्थानिक अर्थव्यवस्थेलाही मोठा फटका बसण्याची शक्यता आहे.
विशेष म्हणजे, फॉक्सवॅगन ही जर्मनीच्या औद्योगिक सामर्थ्याचे प्रतीक मानली जाते. त्यामुळे कंपनीतील इतक्या मोठ्या प्रमाणावरील कर्मचारी कपात आणि कारखाने बंद करण्याची शक्यता ही संपूर्ण युरोपियन ऑटोमोबाईल उद्योगासाठी धोक्याची घंटा मानली जात आहे. कामगार संघटनांनी या प्रस्तावाला तीव्र विरोध दर्शवत आंदोलनाचा इशारा दिला आहे. त्यामुळे कंपनी व्यवस्थापन आणि कामगार संघटनांमध्ये मोठा संघर्ष उभा राहण्याची शक्यता व्यक्त केली जात आहे.
या घडामोडींचा परिणाम केवळ जर्मनीपुरता मर्यादित राहणार नाही. फॉक्सवॅगनचा पुरवठा साखळीशी संबंधित शेकडो उद्योग, जागतिक ऑटो पार्ट्स कंपन्या आणि विविध देशांतील उत्पादन युनिट्सवरही त्याचा प्रभाव पडू शकतो. भारतासह अनेक देशांमध्ये व्होक्सवॅगनची उपस्थिती असल्याने जागतिक स्तरावर उत्पादन, गुंतवणूक आणि रोजगाराच्या धोरणांमध्येही बदल होण्याची शक्यता तज्ज्ञ व्यक्त करत आहेत.
एकेकाळी जागतिक वाहन उद्योगाचे नेतृत्व करणाऱ्या फॉक्सवॅगनला आज इलेक्ट्रिक वाहनांच्या नव्या युगात स्वतःचे अस्तित्व टिकवण्यासाठी कठोर निर्णय घ्यावे लागत आहेत. त्यामुळे हा केवळ एका कंपनीचा पुनर्रचनेचा निर्णय नसून, बदलत्या जागतिक अर्थव्यवस्थेत पारंपरिक वाहन उद्योगासमोरील वाढत्या आव्हानांचेही हे स्पष्ट चित्र मानले जात आहे.