अहमदाबादमध्ये तब्बल ५५० कोटी रुपयांच्या अवैध क्रिकेट सट्टेबाजी आणि शेअर बाजारातील हेराफेरीच्या रॅकेटचा पर्दाफाश झाला असून या प्रकरणात आश्चर्यकारकरीत्या एका रॅपिडो (Rapido) बाईक चालकाचे नाव समोर आले आहे. अंमलबजावणी संचालनालयाने (ED) या प्रकरणाचा तपास करताना मोठ्या आर्थिक गैरव्यवहाराचा मागोवा लावला आहे.मिळालेल्या माहितीनुसार, अहमदाबादमध्ये राहणारा प्रदीप ओड हा तरुण रॅपिडो बाईक चालक असून त्याचे मासिक उत्पन्न साधारण १० ते १२ हजार रुपये इतके आहे. मात्र तपासादरम्यान त्याच्या बँक खात्यातून ३०० कोटी रुपयांहून अधिक व्यवहार झाल्याचे आढळून आले. इतक्या मोठ्या व्यवहारामुळे संशय निर्माण झाला आणि त्यानंतर ईडीने तपास सुरू केला.
हे ही वाचा:
एक्स मुस्लिम सलीम वास्तिकवर हल्ला करणाऱ्या दुसरा आरोपीचेही एन्काऊंटर
युद्धाच्या भीतीने रुपया घसरला; डॉलरसमोर ९२ चा टप्पा पार
हॉर्मुझ सामुद्रधुनी बंद झाली तर भारतासमोर ऊर्जा संकट?
राज्यसभेसाठी भाजपचे उमेदवार ठरले! चार नावे जाहीर
चौकशीत उघड झाले की, प्रदीप ओडने आपले बँक खाते किरण परमार नावाच्या व्यक्तीला २५ हजार रुपयांच्या मोबदल्यात वापरायला दिले होते. त्याला प्रत्येक चेकवर सही करण्यासाठी ४०० रुपये मिळत होते. त्याच्या आधार आणि पॅन कार्डच्या कागदपत्रांचा वापर करून ‘प्रदीप एंटरप्रायझेस’ नावाची कंपनी तयार करण्यात आली होती.
तपासात आणखी दोन कंपन्या समोर आल्या – कमलेश ट्रेडिंग आणि रोनक ट्रेडर्स. या तिन्ही कंपन्या कागदोपत्री अस्तित्वात असल्या तरी प्रत्यक्षात त्यांचा कोणताही व्यवसाय नव्हता. मात्र त्यांच्या बँक खात्यांमधून मोठ्या प्रमाणावर पैसे फिरवले जात होते. तपासात या तिन्ही कंपन्यांच्या खात्यांतून एकत्रितपणे सुमारे ५५० कोटी रुपयांचे व्यवहार झाल्याचे समोर आले आहे.
ईडीच्या मते, या खात्यांचा वापर ऑनलाइन क्रिकेट सट्टेबाजीमधून मिळालेला पैसा फिरवण्यासाठी तसेच शेअर बाजारातील ‘सर्क्युलर ट्रेडिंग’ करून काही पेनी स्टॉक्सचे दर कृत्रिमरीत्या वाढवण्यासाठी करण्यात आला. काही प्रकरणांत शेअर्सच्या किंमतींमध्ये मोठी उसळी आढळल्यामुळे तपास यंत्रणांचे लक्ष या व्यवहारांकडे गेले.
या रॅकेटमध्ये हवाला व्यवहार, बनावट KYC कागदपत्रे आणि बनावट कंपन्या यांचा वापर करून पैशांचा मागोवा लपवण्याचा प्रयत्न करण्यात आला होता. काही निधी वैयक्तिक खर्चासाठी, लग्नसमारंभासाठी तसेच क्राउडफंडिंग प्लॅटफॉर्मवर देणग्या देण्यासाठी वापरल्याचाही संशय तपासात व्यक्त करण्यात आला आहे.
या प्रकरणात किरण परमार उर्फ ‘लाला’ हा मुख्य सूत्रधार असल्याचा संशय व्यक्त केला जात आहे. त्याच्यासह आणखी काही साथीदारांनी बँक खाते, सिम कार्ड आणि कागदपत्रे व्यवस्थापित करून हे जाळे उभारल्याचे तपासात समोर आले आहे.
ईडीने या प्रकरणी अहमदाबाद गुन्हे शाखेकडे तक्रार दाखल केली असून मनी लॉन्डरिंग, बनावट कागदपत्रे, फसवणूक आणि कटकारस्थान यांसारख्या कलमांखाली गुन्हा नोंदवण्यात आला आहे. तपास अद्याप सुरू असून पुढील काळात आणखी अटक आणि मालमत्ता जप्तीची शक्यता व्यक्त केली जात आहे.
