झारखंडमध्ये कार्यरत असलेल्या आठ नक्षलवाद्यांनी हिंसेचा मार्ग सोडून छत्तीसगडमधील बीजापूर पोलिसांसमोर आत्मसमर्पण केले आहे. आत्मसमर्पण करणाऱ्यांमध्ये पाच महिला नक्षलवाद्यांचा समावेश असून, त्यांच्यावर एकूण ४९ लाख रुपयांचे बक्षीस घोषित करण्यात आले होते.
छत्तीसगड सरकारच्या नक्षल आत्मसमर्पण आणि पुनर्वसन धोरणामुळे, तसेच बीजापूर जिल्ह्यात राबविण्यात येणाऱ्या पुनर्वसन व कौशल्य विकास योजनांमुळे प्रभावित होऊन या नक्षलवाद्यांनी मुख्य प्रवाहात परतण्याचा निर्णय घेतला. झारखंड पोलिस आणि केंद्रीय राखीव पोलिस दलाच्या (CRPF) समन्वयाने त्यांनी बीजापूर पोलिसांसमोर शरणागती पत्करली.
आत्मसमर्पण केलेले सर्वजण प्रतिबंधित भारतीय कम्युनिस्ट पक्ष (माओवादी) या संघटनेशी संबंधित होते आणि झारखंडमधील विविध भागांत सक्रियपणे कार्यरत होते. सुरक्षा यंत्रणांच्या वाढत्या कारवाया, माओवादी संघटनेची ढासळत चाललेली स्थिती, संघटनेच्या हिंसक व जनविरोधी विचारसरणीबद्दल निर्माण झालेला भ्रमनिरास, यापूर्वी आत्मसमर्पण केलेल्या नक्षलवाद्यांचे यशस्वी पुनर्वसन आणि आदिवासी भागात वेगाने सुरू असलेली विकासकामे या कारणांमुळे त्यांनी शस्त्रे खाली ठेवून समाजाच्या मुख्य प्रवाहात सहभागी होण्याचा निर्णय घेतल्याचे अधिकाऱ्यांनी सांगितले.
आत्मसमर्पण करणाऱ्यांमध्ये अश्विन ऊर्फ लच्छू, रंगा ऊर्फ सोहन आणि दोबा माडवी ऊर्फ राहत यांच्यावर प्रत्येकी ८ लाख रुपयांचे, तर फगनी पोयम ऊर्फ रजनी, सूरज मुन्नी चम्पिया ऊर्फ सुबनी, हिडमे कडती ऊर्फ रीता, बुधरी कुंजाम ऊर्फ अनुषा आणि सलमी चम्पिया ऊर्फ जिलानी यांच्यावर प्रत्येकी ५ लाख रुपयांचे बक्षीस जाहीर करण्यात आले होते.
हे ही वाचा:
गोळीबाराचे आदेश शहांनी दिले…राहुल गांधींचे आरोप, माफीची मागणी
सागरी कर्मचाऱ्यांच्या पुरवठ्यात भारत जगात दुसरा; रशिया-चीनलाही टाकले मागे
मुंबई-अहमदाबाद महामार्गावर ७ बांगलादेशी तृतीयपंथीयांना अटक
पंतप्रधान मोदींबाबत आक्षेपार्ह पोस्ट; एक्स खात्यांना नोटिसा
छत्तीसगड सरकारच्या पुनर्वसन धोरणानुसार या सर्वांना आर्थिक सहाय्य, कौशल्य विकासाचे प्रशिक्षण, निवासाची सुविधा, शिक्षण, स्वयंरोजगार तसेच रोजगाराच्या संधी उपलब्ध करून दिल्या जाणार आहेत. याशिवाय समाजात त्यांचे सन्मानपूर्वक पुनर्वसन व्हावे आणि ते कायमस्वरूपी मुख्य प्रवाहातील जीवनाशी जोडले जावेत, यासाठी जिल्हा प्रशासन आणि पोलिसांकडून सातत्याने मार्गदर्शन व आवश्यक सहकार्य दिले जाणार असल्याचे प्रशासनाने स्पष्ट केले.
