मणिपूरमध्ये १३ उग्रवादी जेरबंद; शस्त्रसाठा जप्त

मणिपूरमध्ये उग्रवादी संघटनांविरोधातील कारवायांना वेग आला असून, विविध जिल्ह्यांत सुरक्षा दलांनी केलेल्या संयुक्त मोहिमेत १३ उग्रवाद्यांना अटक करण्यात आली आहे. गेल्या २४ तासांत झालेल्या या कारवाईत युनायटेड पीपल्स पार्टी ऑफ कांगलेईपाक (UPPK)च्या सहा सदस्यांचाही समावेश आहे. यासोबतच सुरक्षा दलांनी मोठ्या प्रमाणात शस्त्रे आणि दारुगोळा ताब्यात घेतला.

मणिपूर पोलीस, आसाम रायफल्स आणि अन्य केंद्रीय सुरक्षा दलांनी बिष्णुपूर, इम्फाळ पश्चिम, इम्फाळ पूर्व, चंदेल आणि काकचिंग जिल्ह्यांत ही संयुक्त कारवाई केली. म्यानमारच्या सीमेला लागून असलेल्या चंदेल जिल्ह्यातही मोठ्या प्रमाणात शस्त्रसाठा सापडला आहे. या भागात अद्याप सीमेला कुंपण नसल्याचेही सांगण्यात आले.

पोलिसांच्या माहितीनुसार, अटक करण्यात आलेले संशयित पीपल्स लिबरेशन आर्मी (PLA), रिव्होल्युशनरी पीपल्स फ्रंट (RPF), सोशलिस्ट रिव्होल्युशनरी पार्टी ऑफ कांगलेईपाक, UPPK आणि पीपल्स रिव्होल्युशनरी पार्टी ऑफ कांगलेईपाक या प्रतिबंधित संघटनांशी संबंधित आहेत. या संघटनांशी संबंधित व्यक्तींवर हल्ले, अपहरण, जबरदस्तीने पैसे वसूल करणे तसेच तरुणांची संघटनांमध्ये भरती करणे अशा बेकायदेशीर कारवायांमध्ये सहभागी असल्याचा आरोप आहे.

कारवाईदरम्यान सुरक्षा दलांच्या हाती एमपी-०९ रायफल, सीएमजी, मॉडिफाइड .३०३ रायफल, आणखी एक रायफल, विविध कॅलिबरची सात पिस्तुले, आठ सिंगल-बॅरल बंदुका, १४ बारा-बोअर बंदुका, डबल-बॅरल बंदूक आणि पॉम्पी गन लागल्या. याशिवाय रॉकेट, दोन हँड ग्रेनेड, मोर्टार बॉम्ब, दोन लँड माइन्स, इम्प्रोव्हाइज्ड फ्रॅगमेंटेशन माइन, चार डेटोनेटर आणि मोठ्या प्रमाणातील जिवंत काडतुसे जप्त करण्यात आली आहेत. काही वाहने, दुचाकी, खंडणीच्या पावत्या आणि आक्षेपार्ह तसेच गोपनीय कागदपत्रेही सुरक्षा दलांनी ताब्यात घेतली.

हे ही वाचा:

महाप्रलय! नेपाळमध्ये हाहाकार, १०५ भारतीय बेपत्ता

भारत-फ्रान्स मिळून बनवणार ‘अरावली’ हेलिकॉप्टर इंजिन

बाब-अल-मंदेबवर भारतीय नौदलाची नजर; दोन जहाजांचा सुरक्षित प्रवास

मुदत संपलेले मासे, अस्वच्छ किचन; बंगळुरूतील हाय-प्रोफाइल क्लबमधील प्रकार

सेनापती जिल्ह्यातील तापहौ कुकी आणि तापहौ लियांगमाई गावांमध्ये उभारण्यात आलेले तीन बेकायदा बंकर सुरक्षा दलांनी नष्ट केले. दरम्यान, सोमवारी दोन गटांमध्ये झालेल्या गोळीबारात सीआरपीएफचा एक जवान जखमी झाला. याच परिसरात किमान दोन घरांना आग लावण्यात आल्याने परिस्थिती आणखी चिघळली. घटनेच्या निषेधार्थ आंदोलन झाले आणि राष्ट्रीय महामार्ग-२ वर वाहतूक विस्कळीत झाली. नागा आणि कुकी समुदायांमध्ये सुरू असलेल्या तणावाच्या पार्श्वभूमीवर तापहौ परिसरात पुन्हा हिंसाचाराच्या घटना घडल्याचे पोलिसांनी सांगितले.