जंतर-मंतरवरील आंदोलनातून सौरभ भारद्वाजांसह १५० जण ताब्यात

दिल्लीतील जंतर-मंतरवर विशेष मतदार यादी पुनरावलोकन म्हणजेच एसआयआरच्या विरोधात शुक्रवार, २ ऑक्टोबर रोजी प्रस्तावित करण्यात आलेल्या आंदोलनाला पोलिसांनी परवानगी नाकारल्यानंतर परिसरात मोठा बंदोबस्त तैनात करण्यात आला होता. आंदोलनस्थळी पोहोचलेल्या आम आदमी पक्षाचे दिल्ली प्रदेशाध्यक्ष सौरभ भारद्वाज यांच्यासह अनेक नेते, विद्यार्थी कार्यकर्ते आणि आंदोलकांना पोलिसांनी ताब्यात घेतले. सुमारे १५० जणांना ताब्यात घेण्यात आले होते.

जंतर-मंतर परिसरात पोलिस आणि आरएएफचे जवान मोठ्या संख्येने तैनात करण्यात आले होते. परिसरात बॅरिकेडिंग करण्यात आली असून, आंदोलकांना आंदोलनस्थळाकडे जाण्यापासून रोखण्यात आले. काही ठिकाणी पोलिसांनी आंदोलकांना बसमध्ये बसवून ताब्यात घेतले. योगेंद्र यादव, नेहा बोरा यांच्यासह विविध राजकीय पक्ष आणि विद्यार्थी संघटनांशी संबंधित कार्यकर्त्यांनाही पोलिसांनी ताब्यात घेतल्याचे वृत्त आहे. नवी दिल्ली जिल्ह्यात भारतीय नागरिक सुरक्षा संहितेच्या कलम १६३ अंतर्गत निर्बंध लागू करण्यात आले आहेत. जंतर-मंतरवरील प्रस्तावित आंदोलनाच्या पार्श्वभूमीवर दिल्ली पोलिसांनी अतिरिक्त सुरक्षा दल तैनात केले होते.

या आंदोलनाचा परिणाम दिल्ली मेट्रोच्या वाहतुकीवरही झाला आहे. सुरक्षेच्या कारणास्तव ११ मेट्रो स्थानकांवरील प्रवेश आणि बाहेर पडण्याचे मार्ग पुढील आदेशापर्यंत बंद करण्यात आले. यामध्ये जनपथ, पटेल चौक, केंद्रीय सचिवालय, मंडी हाउस, राजीव चौक, लोक कल्याण मार्ग आणि इतर स्थानकांचा समावेश आहे. काही स्थानकांवर मात्र इंटरचेंजची सुविधा सुरू ठेवण्यात आली आहे.

हे ही वाचा:

“हल्ला झाला तेव्हा हनुमान चालीसा म्हणत होतो, हनुमानजींनीच वाचवले!”

“हिंदुस्तानी जीव घेणारे नाही, जीव वाचवणारे”

फ्लाय दुबईचा ‘तो’ हल्लेखोर वैमानिक जिहादी विचारसरणीचा

राहुल गांधींनी गौरवलेल्या ‘मोहम्मद दीपक’ला धमकी प्रकरणी अटक

दरम्यान, जंतर-मंतरकडे जाण्याचा प्रयत्न करणाऱ्या आपच्या महिला कार्यकर्त्यांनाही पोलिसांनी ताब्यात घेतले. डीवायएफआय आणि एसएफआयच्या कार्यकर्त्यांनीही बॅरिकेड्स ओलांडून आंदोलनस्थळी जाण्याचा प्रयत्न केला. यावेळी पोलिसांनी अनेकांना ताब्यात घेतले.