बंगालमध्ये भाजप खासदार राजू बिष्ट यांच्या ताफ्यावर दगडफेक; गाडीच्या काचा फुटल्या!

भाजपचे खासदार राजू बिष्ट यांच्या ताफ्यावर शनिवारी (१८ ऑक्टोबर) रात्री मझीधुरा (सुखिया पोखरी ब्लॉक) भागातून परतताना हल्ला झाला. याप्रकरणी त्यांनी जोरबंगलो पोलिस ठाण्यात लेखी तक्रार दाखल केली आहे. सध्या बिष्ट हे दार्जिलिंगमधील भूस्खलन प्रभावित भागांमध्ये सतत दौरे करत असून, तेथे मदतसामग्रीचे वितरण करत आहेत. हल्ल्यानंतर त्यांनी माध्यमांशी बोलताना सांगितले की, त्यांच्या ताफ्यातील एका कारवर दगडफेक झाली, ज्यामुळे कारची काच फुटली.

त्यांनी आरोप केला की, केंद्र सरकारने पर्वतीय भागातील कायमस्वरूपी राजकीय समस्येचे समाधान शोधण्यासाठी मध्यस्थ नेमल्याच्या विरोधात हा हल्ला करण्यात आला. बिष्ट म्हणाले, “जर त्यांच्यात हिंमत असती, तर दिवसा समोरासमोर येऊन हल्ला केला असता. रात्रीच्या अंधारात हल्ला करणे ही भ्याडपणाची लक्षणे आहेत.”

दरम्यान,  ६ ऑक्टोबर रोजी, उत्तर मालदा येथून दोन वेळा खासदार राहिलेले भाजप खासदार खगेन मुर्मू उत्तर बंगालमधील पूरग्रस्त भागांना भेट देत असताना त्यांच्यावर स्थानिकांनी हल्ला केला होता, ज्यात ते गंभीर जखमी झाले होते. मुसळधार पाऊस आणि भूस्खलनानंतर मदत आणि बचाव कार्याचे निरीक्षण करण्यासाठी ते जलपाईगुडीच्या डुअर्स प्रदेशातील नागरकाटा भागात जात असताना ही घटना घडली. पंतप्रधान मोदींनीही या हल्ल्याचा निषेध केला होता.