यूएस नागरिकांना लक्ष्य करणाऱ्या कॉल सेंटरचा पर्दाफाश

केंद्रीय अन्वेषण ब्युरोने (सीबीआय) अमेरिकन नागरिकांना लक्ष्य करणाऱ्या आंतरराष्ट्रीय सायबर क्राइम नेटवर्कचा भंडाफोड केला आहे. या कारवाईबद्दल अमेरिकेने सीबीआयचे आभार मानले आहेत. सोशल मीडिया प्लॅटफॉर्म ‘एक्स’वरील पोस्टमध्ये अमेरिकेच्या दूतावासाने लिहिले, “भारताच्या सीबीआयने अमेरिकन नागरिकांना लक्ष्य करणारे एक बेकायदेशीर कॉल सेंटर बंद केले आणि आंतरराष्ट्रीय सायबर गुन्हेगारी नेटवर्कमधील एका महत्त्वपूर्ण ऑपरेटिव्हला अटक केली आहे.”

पोस्टमध्ये पुढे लिहिले आहे, “समन्वयित गुप्त माहिती आणि निर्णायक कृतीद्वारे आमच्या संस्था भविष्यातील स्कॅम थांबवण्यासाठी आणि नागरिकांचे संरक्षण करण्यासाठी एकत्र काम करत आहेत. सततच्या सहकार्याबद्दल धन्यवाद.” अमेरिकन दूतावासाने एक अधिकृत निवेदनही जाहीर केले. निवेदनानुसार, “सीबीआयने ट्रान्सनॅशनल सायबर क्राइम नेटवर्क चालवणाऱ्या मुख्य फरार आरोपी विकास कुमार निमारला अटक केली आहे आणि लखनऊमध्ये चालणाऱ्या अमेरिकन नागरिकांना लक्ष्य करणाऱ्या बेकायदेशीर कॉल सेंटरचा भंडाफोड केला आहे.”

हेही वाचा..

मोदी सरकारमध्ये शेतीसाठी विजेची उपलब्धता वाढली!

बुलडोझर कारवाईबद्दल काय म्हणाले माजी सरन्यायाधीश?

एक कोटी तरुणांना नोकरी व रोजगार देणे सरकारची प्राथमिकता

बांगलादेशमध्ये का उतरले विद्यार्थी रस्त्यावर ?

सीबीआयने २४ सप्टेंबर २०२४ रोजी या प्रकरणात केस नोंदवली होती. त्यानंतर आरोपिंच्या ठिकाणी मोठ्या प्रमाणात छापेमारी करण्यात आली. या दरम्यान पुणे, हैदराबाद आणि विशाखापट्टणम येथे चालणारी ४ बेकायदेशीर कॉल सेंटर्स बंद करण्यात आली होती. केस नोंदवल्यापासूनच मुख्य आरोपी विकास कुमार निमार फरार होता. तो पुणे आणि विशाखापट्टणम मधील बेकायदेशीर कॉल सेंटर VC Informatrics Pvt Ltd सुरू करण्यास आणि चालविण्यास मुख्यत्वे जबाबदार होता.

अमेरिकन दूतावासाने सांगितले की, आरोपीला अटक करण्यासाठी सीबीआयने पुण्याच्या मुख्य न्यायिक दंडाधिकाऱ्यांच्या न्यायालयातून वॉरंट घेतले. त्यानंतर एजन्सीने २० नोव्हेंबर २०२५ रोजी लखनऊ येथील त्याच्या घरी छापा टाकून त्याला अटक केली.” घराच्या तपासात १४ लाख रुपये रोख, मोबाईल फोन आणि गुन्ह्याशी संबंधित कागदपत्रे जप्त करण्यात आली. छाप्यादरम्यान लखनऊमधील आणखी एक बेकायदेशीर कॉल सेंटरही सीबीआयने बंद केले, जिथून अमेरिकन नागरिकांना लक्ष्य केले जात होते. या ठिकाणाहून ५२ लॅपटॉप जप्त झाले असून, त्यामध्ये डिजिटल पुरावे आहेत आणि हे लॅपटॉप सायबर क्राइम नेटवर्क चालवण्यासाठी वापरले जात असल्याचे समोर आले आहे.