जर्मनीमधील नॉर्थ ऱ्हाईन-वेस्टफेलिया राज्यातील मोअर्स शहरात, ड्युइसबर्ग येथील गुरुद्वारा सिंह सभामध्ये हिंसाचाराची घटना घडली. पेपर स्प्रे, चाकू, कृपाण आणि एक अग्निशस्त्र बाळगणाऱ्या ४० हून अधिक लोकांमध्ये एक हिंसक संघर्ष उफाळून आला, अशी माहिती समोर आली आहे. या संघर्षात किमान ११ जण जखमी झाले आणि त्यामुळे पोलिसांना मोठी कारवाई करावी लागली, ज्यात विशेष पोलीस रणनीतिक पथके तैनात करण्यात आली, असे जर्मन वृत्तपत्र ‘बिल्ड’ने म्हटले आहे. प्रत्यक्षदर्शींच्या मते, हा संघर्ष गुरुद्वाराच्या आर्थिक व्यवहार आणि व्यवस्थापनावरून झालेल्या वादातून उद्भवला होता, मात्र जर्मन पोलिसांनी अद्याप याचे नेमके कारण स्पष्ट केलेले नाही.
रविवारी दुपारी हा संघर्ष सुरू झाला आणि लवकरच त्याला हिंसक वळण मिळाले. ज्यामध्ये एका गटाने एक सुनियोजित हल्ला केला. प्रत्यक्षदर्शींनी सांगितले की, विरोधकांना गोंधळात टाकण्यासाठी पेपर स्प्रेचा वापर करण्यात आला, त्यानंतर चाकू आणि बंदुकीने हल्ले करण्यात आले. एका ५६ वर्षीय प्रत्यक्षदर्शीने सांगितले की, हा हल्ला पूर्वनियोजित वाटत होता: “प्रार्थनेच्या थोड्या वेळापूर्वी, हल्लेखोरांनी पेपर स्प्रेचा वापर केला, त्यानंतर एकाने पिस्तूल चालवले. मी चाकूही पाहिले.” ही हिंसा गुरुद्वारा समुदायातील दीर्घकाळापासून सुरू असलेल्या अंतर्गत वादातून उद्भवली असल्याचे मानले जाते, ज्याचे केंद्रबिंदू समितीवरील नियंत्रण, प्रभाव आणि कथित आर्थिक मतभेद आहेत. “यामागील पार्श्वभूमी म्हणजे माजी आणि विद्यमान समिती सदस्यांमधील वाद आहे. यात समुदायाच्या पैशांचाही समावेश आहे. बऱ्याच काळापासून समस्या आणि अडचणी आहेत. पण मुख्यत्वेकरून हा मुद्दा प्रभावाचा आणि मंदिरात कोणाचे म्हणणे ग्राह्य धरले जाते याचा आहे,” असे पुढे त्याने सांगितले.
घटनास्थळी असलेल्या एका व्यक्तीने असा आरोप केला आहे की, हा संघर्ष गुरुद्वाराच्या गोलकावरून (गुरुद्वारात भेटवस्तू, नैवेद्य आणि आर्थिक योगदान ठेवण्यासाठी ठेवलेली दानपेटी) झालेल्या वादामुळे, तसेच निवडणुकीत पराभूत झाल्यानंतर संस्थेच्या मागील व्यवस्थापनाने गुरुद्वाराचा कारभार पुन्हा ताब्यात घेण्याच्या प्रयत्नामुळे झाला. जेव्हा हिंसाचार उसळला, तेव्हा अनेक भाविक घाबरले आणि भीतीने गुरुद्वारातून पळून गेले. दरम्यान, या घटनेत ११ जण जखमी झाल्याचे वृत्त आहे, त्यापैकी बहुतेकांना डोक्याला दुखापत झाली आहे.
हे ही वाचा:
एनजीओच्या आडून धर्मांतर, लैंगिक शोषणाचा प्रकार; रियाज काजी अटकेत
मणिपूरमधून शस्त्रास्त्रे आणि स्फोटकांचा साठा जप्त
जागतिक ॲथलेटिक्स रिले चॅम्पियनशीपसाठी हर्ष राऊतची निवड
घरून काम, फक्त सहा आठवड्यांचे जेट इंधन शिल्लक
हिंसाचाराचे प्रमाण इतके मोठे होते की परिस्थिती नियंत्रणात आणण्यासाठी पोलिसांनी तातडीने एक मोठी मोहीम सुरू केली. बिल्डच्या वृत्तानुसार, गोळीबाराच्या वृत्तांनंतर ड्युसेलडॉर्फ येथील स्पेशल टास्क फोर्स (एसईके) च्या तुकडीसह सुमारे १०० अधिकाऱ्यांनी इमारतीला वेढा घातला. सशस्त्र जवानांनी आपापली जागा घेतली, तर एका हेलिकॉप्टरने हवाई मदत पुरवली. आतमध्ये सशस्त्र संशयित असल्याच्या भीतीने, अधिकाऱ्यांनी गुरुद्वारा सील केला आणि त्यानंतर सबमशीनगनधारी एसईकेच्या अधिकाऱ्यांनी आवारात प्रवेश केला. कोणताही बंदूकधारी आढळला नाही आणि किमान एका संशयिताला ताब्यात घेण्यात आले.
