टायगरवरील हल्ल्यानंतर आरोपींना मिळत होते मीडियातून अपडेट्स

अभिनेता टायगर श्रॉफच्या कारवर मुंबईतील जुहू परिसरात झालेल्या गोळीबार प्रकरणात धक्कादायक माहिती समोर आली आहे. गोळीबार करून पळून जाणाऱ्या आरोपींना पोलिस तपासाची माहिती सतत दिली जात होती. वृत्तवाहिन्यांवर प्रसारित होणाऱ्या बातम्यांवर लक्ष ठेवून सूत्रधार आरोपींना संदेश पाठवत होते आणि पोलिसांची कारवाई किती पुढे गेली आहे, याबाबत त्यांना अपडेट करत होते, अशी माहिती पोलिस सूत्रांच्या हवाल्याने समोर आली आहे.

१८ ऑक्टोबर रोजी टायगर श्रॉफच्या कारवर गोळीबार झाला होता. या घटनेत अभिनेता सुरक्षित राहिला; मात्र त्याचा चालक आणि अन्य एक व्यक्ती जखमी झाले. हल्ल्यानंतर आरोपी दुचाकीवरून पळून गेले. तपासादरम्यान वृत्तवाहिन्यांवर आरोपींचे चेहरे दिसल्यानंतर त्यांच्यापैकी एकाला, “तुमचे चेहरे दिसले आहेत, तिथून निघून जा,” अशा आशयाचा संदेश मिळाल्याचे समोर आले आहे.

तपास यंत्रणांच्या माहितीनुसार, आरोपींना इंटरनेटच्या माध्यमातून संदेश आणि कॉल करण्यासाठी वापरल्या जाणाऱ्या ऍपद्वारे सूचना दिल्या जात होत्या. सिग्नल किंवा झांगी यांसारख्या ऍपचा वापर झाला असावा, असा तपास अधिकाऱ्यांचा संशय आहे. मात्र, नेमके कोणते ऍप वापरण्यात आले, हे अद्याप स्पष्ट झालेले नाही.

गोळीबारासाठी वापरलेली दुचाकी अंधेरी परिसरात आढळल्याची आणि आरोपींनी ट्रेनने प्रवास केल्याची माहिती प्रसारमाध्यमांत आल्यानंतरही त्यांना संदेश पाठवण्यात आल्याचा दावा पोलिस सूत्रांनी केला आहे. त्यामुळे आरोपींनी प्रवासाचे साधन आणि मार्ग वारंवार बदलल्याचे सांगितले जाते. दुचाकीनंतर ट्रेन, त्यानंतर कॅब आणि पुढे सुरतहून बसने जाण्याचा त्यांचा विचार होता. मात्र, बस मिळण्यास विलंब झाल्याने त्यांनी पुन्हा ट्रेनने प्रवास करण्याचा निर्णय घेतला. अखेर मुंबई पोलिसांकडून मिळालेल्या माहितीच्या आधारे कोटा पोलिसांनी त्यांना ट्रेनमध्ये पकडले.

हे ही वाचा:

काँग्रेस, आम आदमी पक्ष पंजाबचे सर्वात मोठे शत्रू!

‘समुद्र मंथन’ योजनेतून खोल समुद्रातील तेल-वायू उत्खननाला बळ

ट्रम्प यांचा ‘एपिक फ्युरी २.०’चा इशारा

भारत चीन सीमावादात राजनैतिक चर्चेचा मार्ग

या प्रकरणात फुलसिंग (१८), रेहान रहीसुद्दीन अन्सारी (१८) आणि ऋतिक महतो (२२) या तिघांना राजस्थानातील कोटा येथे अटक करण्यात आली होती. तिघेही ३१ ऑक्टोबरपर्यंत पोलिस कोठडीत आहेत. या प्रकरणात आतापर्यंत दहा जणांना अटक झाल्याची माहिती आहे.