टायगर प्रकरणात दादर कनेक्शन…दोन तरुणीही कटात सामील

अभिनेता टायगर श्रॉफ याच्या कारवर मुंबईत झालेल्या गोळीबारप्रकरणी दिल्ली पोलिसांच्या स्पेशल सेलच्या एनडीआर पथकाने दोन तरुणींसह चार आरोपींना अटक केली आहे. सीतापूर आणि आझमगड येथील तरुणींच्या माध्यमातून शस्त्र मुंबईत पोहोचवण्यात आल्याचा पोलिसांचा आरोप आहे.

पोलिसांच्या माहितीनुसार, हरियाणातील सोनीपत येथील कुनाल (२१) याने अमृतसरमधून पिस्तूल आणि २० काडतुसे मिळवली होती. त्यानंतर सीतापूर येथील राधा (२३) आणि आझमगड येथील बबिता (२३) यांच्या माध्यमातून ते मुंबईत पाठवण्यात आले. सोनीपत येथील सुमित (१९) यालाही या प्रकरणात अटक करण्यात आली आहे.

तपास यंत्रणेच्या आरोपानुसार, कुनाल एन्क्रिप्टेड ऍपद्वारे अनिल पंडितच्या संपर्कात होता आणि त्याच्या निर्देशानुसार काम करत होता. अनिलच्या सांगण्यावरून कुनालने शस्त्र मिळवले. राधाशी जवळीक वाढवल्यानंतर तिला शस्त्र घेऊन मुंबईला जाण्यास तयार केल्याचा आरोपही त्याच्यावर आहे. १५ ऑक्टोबर रोजी कुनाल राधा आणि बबिता यांना नवी दिल्ली रेल्वे स्थानकावर घेऊन गेला. त्या वेळी पिस्तूल राधाच्या बॅगेत होते. १७ ऑक्टोबरला दोघी दादर स्थानकावर पोहोचल्या आणि एका हॉटेलमध्ये थांबल्या. त्याच दिवशी सकाळी सुमारे ११ वाजता हॉटेलजवळ एका अल्पवयीन मुलाने राधाकडून बॅग घेतल्याचा पोलिसांचा आरोप आहे.

१८ ऑक्टोबर रोजी संध्याकाळी सुमारे सात वाजता टायगर श्रॉफच्या कारवर गोळीबार झाला. त्यानंतर शूटर मुंबईत अडकल्याचे अनिल पंडितने कुनालला सांगून त्यांच्या बाहेर पडण्याची व्यवस्था करण्यास सांगितल्याचा दावा तपास यंत्रणेने केला आहे. त्याच दिवशी राधा आणि बबिता हरिद्वार एक्स्प्रेसने दिल्लीला रवाना झाल्या.

हे ही वाचा:

रुबिओंसमोर २६/११ च्या प्रत्यक्ष साक्षीतून पाकिस्तानस्थित दहशतवादाचे वास्तव!

अल्पवयीन मुलीला थपडा मारणाऱ्या मोहम्मद गुर्फान शेखच्या आवळल्या मुसक्या

हिंदू मंदिरावरील हल्ल्याच्या कटाची ‘हेट क्राइम’ म्हणून चौकशीची मागणी

३१ डिसेंबर २०२९ पर्यंत भारत नशामुक्त करण्याचे लक्ष्य!

पोलिसांनी २० ऑक्टोबर रोजी दोन्ही तरुणींना नवी दिल्ली रेल्वे स्थानकावरून, तर कुनाल आणि सुमित यांना सोनीपत येथून अटक केली. सुरुवातीला आरोपींना न्यायालयात हजर केल्यानंतर मुंबई सीआयडीने औपचारिक अटकेसाठी आणि चौकशीसाठी परवानगी मागितली. न्यायालयाच्या मंजुरीनंतर चौघांना औपचारिकरीत्या अटक करण्यात आली असून, त्यांना तीन दिवसांच्या ट्रान्झिट रिमांडवर मुंबईला नेण्याची परवानगी मिळाली आहे.