हरियाणातील गँगस्टर हिमांशू भाऊ अमेरिकेत अटकेत

भारताच्या मोस्ट वॉन्टेड गुन्हेगारांपैकी एक असलेला हरियाणातील गँगस्टर हिमांशू भाऊ याला अमेरिकेत अटक करण्यात आल्याची माहिती समोर आली आहे. अमेरिकेच्या फेडरल ब्युरो ऑफ इन्व्हेस्टिगेशनने (एफबीआय) त्याला ताब्यात घेतल्याचे वृत्त आहे. हत्या, हत्येचा प्रयत्न आणि खंडणी यांसारख्या अनेक गंभीर गुन्ह्यांमध्ये दिल्ली आणि हरियाणा पोलिसांना त्याचा शोध होता. यूट्यूबर एल्विश यादव याच्या घराबाहेर झालेल्या गोळीबाराच्या प्रकरणातही हिमांशू भाऊच्या टोळीचे नाव समोर आले होते.

हिमांशू भाऊचे खरे नाव हिमांशू रिटोलिया असून, तो हरियाणातील रोहतक जिल्ह्यातील रिटोली गावचा रहिवासी आहे. दिल्ली-एनसीआर, हरियाणा आणि पंजाबमध्ये त्याने गुन्हेगारी नेटवर्क उभारल्याचा आरोप आहे. त्याच्याविरोधात हत्या, हत्येचा प्रयत्न, खंडणी, बेकायदा शस्त्रांचा वापर आणि गुन्हेगारी कट यांसह विविध प्रकरणे दाखल आहेत.

२०२३ मध्ये इंटरपोलची रेड नोटीस

भारतीय तपास यंत्रणांच्या विनंतीनंतर ऑगस्ट २०२३ मध्ये इंटरपोलने हिमांशू भाऊविरोधात रेड नोटीस जारी केली होती. राष्ट्रीय तपास यंत्रणा (एनआयए), दिल्ली पोलीस आणि हरियाणा पोलिसांच्या वॉन्टेड यादीत त्याचा समावेश होता. २०२० मध्ये बालसुधारगृहातून पळून गेल्यानंतर त्याच्या गुन्हेगारी कारवायांमध्ये वाढ झाल्याचा आरोप आहे. परदेशात राहून तो भारतातील साथीदारांच्या मदतीने टोळी चालवत असल्याचा तपास यंत्रणांना संशय होता.

हे ही वाचा:

चीनच्या बदलत्या गस्तीमुळे सीमावर्ती भागांत तणाव

ट्रम्प यांचा ‘एपिक फ्युरी २.०’चा इशारा

पंतप्रधान मोदी, कॅप्टन स्मित यांना इस्रायलच्या स्वातंत्र्यदिनी मशाल प्रज्वलनाचे निमंत्रण

महापौर, अमिताभ, दिलजित दोसांजसह शाळांना बॉम्बची धमकी

हिमांशू भाऊचा संबंध नीरज बवाना टोळीशी असल्याचे सांगितले जाते. तसेच लॉरेन्स बिश्नोई आणि गोल्डी ब्रार यांच्या नेटवर्कशी त्याचे वैर असल्याची माहिती आहे. दिल्लीतील बर्गर किंग आउटलेटमधील हत्या, व्यावसायिकांवर गोळीबार आणि खंडणीसाठी धमकावण्याच्या घटनांमध्ये त्याच्या टोळीचे नाव तपासात समोर आले आहे. अमेरिकेत अटकेनंतर हिमांशू भाऊला भारतात आणण्याच्या दृष्टीने पुढील कायदेशीर प्रक्रिया महत्त्वाची ठरणार आहे. त्याचे भारतात प्रत्यार्पण किंवा हस्तांतरण लागू असलेल्या कायदेशीर प्रक्रियेनुसारच होऊ शकते.