इम्रान खान भारत छोडो!

मुख्य निवडणूक आयुक्त ज्ञानेश कुमार यांच्या विरोधात १० ऑक्टोबर रोजी झालेल्या आंदोलनात सहभागी झाल्याबद्दल, आमिर खानचा भाचा, अभिनेता इम्रान खान याला २८ ऑक्टोबरपर्यंत भारत सोडण्यास सांगण्यात आले आहे. मुंबईतील ऑगस्ट क्रांती मैदानावर मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आयोजित आंदोलनात सहभागी झाल्यानंतर ही कारवाई करण्यात आली आहे. इम्रान खान हा अभिनेता अमेरिकेचा नागरिक आहे.

१० ऑक्टोबर रोजी मुंबईतील ऑगस्ट क्रांती मैदानावर हे आंदोलन आयोजित करण्यात आले होते. दिल्लीतील ‘कॉकरोच जनता पार्टी’च्या आंदोलनाला पाठिंबा देण्यासाठी आणि मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यासाठी आंदोलक एकत्र आले होते. मतदार याद्यांच्या विशेष सखोल पुनरीक्षणाच्या (एसआयआर) प्रक्रियेवरूनही या आंदोलनात आक्षेप नोंदवण्यात आले होते.

या आंदोलनादरम्यान मुंबई पोलिसांनी इम्रान खान याच्यासह अनेक आंदोलकांना ताब्यात घेतले होते. इम्रान याच्यासोबत त्याची जोडीदार लेखा वॉशिंग्टन आणि चुलत बहीण झैन मारी खान यांनाही ताब्यात घेण्यात आले होते. नंतर या तिघांची सुटका करण्यात आली.

परदेशी नागरिक असल्याने कारवाई

इम्रान खान हा भारतीय नागरिक नसून अमेरिकेचा नागरिक आहे. वृत्तांनुसार, तो भारतात ओव्हरसीज सिटिझन ऑफ इंडिया (OCI) कार्डधारक म्हणून राहत होता. परदेशी नागरिकांच्या भारतातील वास्तव्याशी संबंधित नियमांच्या पार्श्वभूमीवर त्याच्या आंदोलनातील सहभागाची चौकशी करण्यात आली. त्यानंतर परदेशी नागरिकांच्या नोंदणीशी संबंधित प्रादेशिक कार्यालयाकडून (FRRO) त्याला २८ ऑक्टोबरपर्यंत भारत सोडण्याची नोटीस देण्यात आली आहे.

हे ही वाचा:

पोलिसांवर लैंगिक छळाचा आरोप करणाऱ्या महिला पत्रकाराविरोधात गुन्हा

“स्टारलिंक युद्धाचे साधन” उपग्रह इंटरनेट इराणच्या रडारवर

मेट्रो निर्बंधांपासून सुरक्षा व्यवस्थेपर्यंत; दिल्ली पोलिसांचे प्रतिज्ञापत्र

अमेरिकेत हिंदू मंदिरावरील हल्ल्याचा कट उधळला

या आंदोलनाच्या प्रकरणात मुंबई पोलिसांनी इम्रान खान याच्यासह महात्मा गांधी यांचे पणतू तुषार गांधी आणि इतर आंदोलकांविरोधातही गुन्हा दाखल केला होता. वृत्तांनुसार, या प्रकरणात ३०० ते ४०० हून अधिक लोकांचा सहभाग होता. पोलिसांनी भारतीय न्याय संहितेतील बेकायदेशीर जमाव, सार्वजनिक आदेशाचे उल्लंघन आणि चुकीच्या पद्धतीने अडवणे यांसारख्या आरोपांशी संबंधित कलमे लावली होती.