ब्रिटनमधील साऊथॉल येथे भारतीय वंशाचा २६ वर्षीय युवक गुरुभेज सिंग यांची चाकूने भोसकून हत्या करण्यात आली आहे. या घटनेनंतर मेट्रोपॉलिटन पोलिसांनी खुनाचा गुन्हा दाखल करून तपास सुरू केला आहे.
दुकानाबाहेर झाला हल्ला
ही घटना मध्यरात्रीनंतर घडली. लंडन अॅम्ब्युलन्स सेवेकडून चाकू हल्ल्याची माहिती मिळाल्यानंतर पोलिसांना नॉर्थ रोड आणि डॉर्मर्स वेल्स लेन परिसरात पाचारण करण्यात आले.
घटनास्थळी पोहोचल्यानंतर पोलिस आणि वैद्यकीय पथकाला दोन जखमी पुरुष आढळले. गुरभेज सिंग यांची प्रकृती अत्यंत गंभीर होती. त्यांना वाचवण्यासाठी प्रयत्न करण्यात आले, मात्र घटनास्थळीच त्यांचा मृत्यू झाला.
दुसरा जखमी व्यक्ती, ज्याचे वय सुमारे ३० वर्षे असल्याचे सांगितले जात आहे, त्याला उपचारासाठी रुग्णालयात दाखल करण्यात आले. नंतर त्याला डिस्चार्ज देण्यात आला. त्याच्या जखमा जीवघेण्या नसल्याचे पोलिसांनी सांगितले.
सीसीटीव्ही फुटेजची तपासणी
तपास अधिकाऱ्यांच्या माहितीनुसार, रात्री सुमारे १२.३० वाजता परिसरातील एका दुकानाबाहेर गुरभेज सिंग यांच्यावर हल्ला करण्यात आला.
घटनेपूर्वी नेमके काय घडले याचा शोध घेण्यासाठी पोलीस सीसीटीव्ही फुटेज तपासत आहेत तसेच प्रत्यक्षदर्शी साक्षीदारांची चौकशी करत आहेत.
हे ही वाचा:
ट्रम्पसोबत पंगा घेण्याच्या तयारीत
आसाममध्ये प्रौढांना आधारकार्ड देण्यास निर्बंध
ममतांना आणखी एक धक्का; सुदीप बंदोपाध्याय बंडखोरांसोबत
सात जणांना अटक
घटनेनंतर काही तासांतच पोलिसांनी २० ते ३० वयोगटातील सात जणांना खुनाच्या संशयावरून अटक केली.
त्यानंतरच्या चौकशीत सहा जणांना कोणतेही आरोप न ठेवता मुक्त करण्यात आले. एका संशयिताला जामिनावर सोडण्यात आले असून पुढील चौकशीसाठी त्याला पुन्हा हजर राहावे लागणार आहे.
पोलिसांचे आवाहन
या तपासाचे नेतृत्व करणाऱ्या डिटेक्टिव्ह चीफ इन्स्पेक्टर फॉक्सवेल यांनी सांगितले की तपास सुरू असून त्यांची सहानुभूती गुरभेज सिंग यांच्या कुटुंबीय आणि मित्रांसोबत आहे.
त्यांनी घटनेच्या वेळी परिसरात उपस्थित असलेल्या व्यक्तींना किंवा सीसीटीव्ही फुटेज असणाऱ्यांना पोलिसांशी संपर्क साधण्याचे आवाहन केले आहे.
भारतीय समुदायात चिंता
साउथॉल परिसरात मोठ्या प्रमाणात भारतीय आणि शीख समुदाय राहतो. त्यामुळे या हत्येमुळे स्थानिक भारतीय वंशाच्या नागरिकांमध्ये चिंता आणि अस्वस्थता निर्माण झाली आहे.
दरम्यान, गुरभेज सिंग यांचे कुटुंब पंजाबमधील असल्याचे सांगितले जात असून त्यांना विशेष प्रशिक्षित पोलिस अधिकाऱ्यांकडून मदत दिली जात आहे. पोलिसांनी या प्रकरणाबाबत माहिती असलेल्या कोणालाही पुढे येण्याचे आवाहन केले असून तपास सुरू आहे.
