मणिपूरमध्ये शस्त्रसाठ्यासह उग्रवाद्याला अटक

मणिपूरमध्ये सुरक्षा दलांनी विविध कारवायांमध्ये मोठ्या प्रमाणात शस्त्रे आणि दारुगोळा जप्त केला आहे. तसेच, बंदी घातलेल्या पीपल्स रिव्होल्युशनरी पार्टी ऑफ कांगलेईपाक (PREPAK) या संघटनेच्या एका उग्रवाद्याला अटक करण्यात आली असून, सुमारे ५० किलो संशयित अफू जप्त करण्यात आली आहे. या अफूची आंतरराष्ट्रीय अवैध बाजारातील किंमत ३ कोटी रुपयांहून अधिक असल्याचा अंदाज आहे.

पोलीस अधिकाऱ्यांनी दिलेल्या माहितीनुसार, मंगळवारी मणिपूर पोलीस आणि १९ गढवाल रायफल्स यांच्या संयुक्त पथकाने चुराचांदपूर जिल्ह्यातील के. थेनजांग गावाजवळील जंगल परिसरात शोधमोहीम राबवली. या कारवाईत शस्त्रे, स्फोटके आणि युद्धसामग्रीचा मोठा साठा जप्त करण्यात आला. हा परिसर म्यानमार आणि मिझोरामच्या सीमेला लागून आहे. जप्त करण्यात आलेल्या शस्त्रास्त्रांमध्ये आधुनिक शस्त्रांचाही समावेश असून, त्याबाबतचा सविस्तर अहवाल अद्याप प्रतीक्षेत असल्याचे पोलिसांनी सांगितले.

दरम्यान, इम्फाळ पूर्व जिल्ह्यातील योराबुंग पंथोईबी लैकाई परिसरात करण्यात आलेल्या दुसऱ्या कारवाईत PREPAK या बंदी घातलेल्या संघटनेच्या एका उग्रवाद्याला अटक करण्यात आली. त्याच्याकडून आठ शक्तिशाली हँड ग्रेनेड जप्त करण्यात आले. अटक करण्यात आलेल्या उग्रवाद्याची ओळख निंगोमबाम अमुथोई मेईतेई (वय ३०) अशी असून तो इम्फाळ पूर्व जिल्ह्यातील रहिवासी आहे.

याचदरम्यान, मणिपूर पोलिसांनी इम्फाळ-दीमापूर राष्ट्रीय महामार्गावरील हेंगबुंग बॅप्टिस्ट चर्चजवळ बेवारस अवस्थेत आढळलेल्या एका कारमधून सुमारे ५० किलो वजनाच्या संशयित अफूची ४९ पाकिटे जप्त केली. पोलिसांच्या माहितीनुसार, ही कार यापूर्वी सेनापती जिल्ह्यातील टी. खुलेन येथील तपासणी नाका चुकवून वेगाने पळून गेली होती. नंतर ती बेवारस अवस्थेत सापडली. कारमधून उखरूल जिल्ह्यातील जेड. रिथिंगम (वय ५२) यांची कागदपत्रेही जप्त करण्यात आली असून, या प्रकरणाचा पुढील तपास सुरू आहे.

हे ही वाचा:

पाकिस्तानी गँगस्टर शहजाद भट्टीशी संपर्क, पुण्यातल्या ६६ जणांची चौकशी

न्यायालयाची फसवणूक केल्याप्रकरणी समय रैनाला १० लाखांचा दंड

व्यापारी जहाजांवरील हल्ले तात्काळ थांबवा!

जगन्नाथ रथयात्रेपूर्वी मोठा कट उधळला; ५ दहशतवादी अटकेत

जप्त करण्यात आलेल्या अफूची अवैध बाजारातील किंमत ३ कोटी रुपयांपेक्षा अधिक असल्याचे पोलिसांनी सांगितले. प्राथमिक तपासात ही अफू म्यानमारमधून तस्करी करून आणण्यात आल्याचे समोर आले आहे. मणिपूर आणि म्यानमारदरम्यान सुमारे ४०० किलोमीटर लांबीची कुंपण नसलेली सीमा आहे, त्यामुळे या मार्गाचा तस्करांकडून मोठ्या प्रमाणावर वापर केला जात असल्याचे मानले जाते. म्यानमार हा जगातील प्रमुख अफू उत्पादक देशांपैकी एक असून, विशेषतः काचिन आणि शान राज्यांमध्ये अफूचे मोठ्या प्रमाणावर उत्पादन होते.