लाल किल्ला स्फोटाच्या कटात सहभाग नसल्याचा मुजम्मिल, शाहीनचा दावा

दिल्लीतील लाल किल्ला स्फोटाच्या कटात आपला कोणताही सहभाग नसल्याचा दावा आरोपी डॉक्टर मुजम्मिल आणि डॉक्टर शाहीन सईद यांनी केला आहे. स्फोट होण्यापूर्वीच आपल्याला अटक करण्यात आली होती, तसेच स्फोटातील आरोपींशी संपर्क असल्याचा कोणताही पुरावा नाही, असा युक्तिवाद त्यांच्या वकिलांनी न्यायालयात केला. या दोघांच्या वतीने आरोप निश्चितीच्या सुनावणीदरम्यान करण्यात आलेला युक्तिवाद पूर्ण झाला असून, १७ नोव्हेंबरला अन्य आरोपींच्या वतीने बाजू मांडण्यात येणार आहे. लाल किल्ला स्फोट प्रकरणात अटक करण्यात आलेल्या आरोपींविरोधात आरोप निश्चित करण्यासंदर्भातील सुनावणी राऊस एव्हेन्यू न्यायालयातील विशेष एनआयए न्यायालयात सुरू आहे.

लाल किल्ला स्फोटात आपली कोणतीही भूमिका नसल्याचा दावा मुजम्मिल आणि शाहीन सईद यांनी न्यायालयात केला. स्फोट होण्यापूर्वीच आपल्याला अटक करण्यात आली होती, मग या स्फोटाच्या कटात आपला सहभाग कसा सिद्ध होऊ शकतो, असा सवाल त्यांच्या वकिलांनी उपस्थित केला. स्फोटात सहभागी असलेल्या आरोपींशी त्यांचा संपर्क असल्याचा कोणताही पुरावा नसल्याचेही त्यांनी सांगितले.

२९ ऑक्टोबर रोजी डॉक्टर मुजम्मिल आणि स्फोटाच्या एक दिवस आधी, म्हणजे ९ नोव्हेंबर रोजी डॉक्टर शाहीन सईद यांना जम्मू पोलिसांनी कट रचल्याच्या आरोपावरून अटक केली होती. त्यामुळे या स्फोटाशी त्यांचा कोणताही संबंध नसल्याचा युक्तिवाद त्यांच्या वतीने करण्यात आला. स्फोटासाठी वापरण्यात आलेली आय-१० कार खरेदी करण्यातही त्यांची कोणतीही भूमिका सिद्ध झालेली नसल्याचे त्यांनी न्यायालयाला सांगितले.

हे ही वाचा:

ब्रिटनमध्ये ७० मुलींचे लैंगिक शोषण करणाऱ्या नराधम बिलाल काझीला ३० वर्षांची शिक्षा

भारताच्या परकीय चलनसाठ्यात २.४९ अब्ज डॉलरची वाढ

डॉ. थंगजाम धाबाली सिंग यांना वन इंडिया पुरस्कार

भारत-अमेरिका व्यापार कराराची घोषणा लवकरच

यापूर्वीच्या सुनावणीत न्यायालयाने एनआयएने दाखल केलेल्या आरोपपत्राची दखल घेतली होती. १० नोव्हेंबर २०२५ रोजी झालेल्या दिल्लीतील लाल किल्ला स्फोट प्रकरणात एनआयएने गेल्या महिन्यात ७५ हजार पानांचे आरोपपत्र दाखल केले आहे. त्यात १२ आरोपींची नावे आहेत. उमर उन नबी हा या स्फोटाचा मुख्य सूत्रधार असल्याचे एनआयएने म्हटले असून, स्फोटात त्याचाही मृत्यू झाला होता. या स्फोटात १३ जणांचा मृत्यू झाला, तर २४ हून अधिक जण जखमी झाले होते.