अंमलबजावणी संचालनालयाने (ईडी) गुरुवार, 7 मे रोजी पंजाबचे मुख्यमंत्री भगवंत मान यांचे विशेष कार्य अधिकारी (ओएसडी) यांच्या निकटवर्तीयांच्या मालकीच्या ठिकाणी छापेमारी केली आहे. पंजाबमधील एसएएस नगर आणि चंदीगड येथील तीन ठिकाणी मनी लाँडरिंग प्रतिबंधक कायद्याअंतर्गत ईडीने शोधमोहीम राबवली. खरारमधील वेस्टर्न टॉवर्स या निवासी सोसायटीवर टाकलेल्या छाप्यात, ईडीने सुमारे २० लाख रुपये रोकड असलेल्या दोन बॅगा जप्त केल्या. या बॅगा इमारतीच्या नवव्या मजल्यावरून खाली फेकण्यात आल्या होत्या.
खरारजवळील छज्जू माजरा येथील वेस्टर्न टॉवर्समधील फ्लॅट क्रमांक ९०६ चा दरवाजा ईडीच्या अधिकाऱ्यांनी ठोठावताच रोकड भरलेल्या बॅगा लोकांनी खाली फेकून दिल्या. “फ्लॅटमधील लोकांनी रोकड भरलेल्या दोन बॅगा जमिनीवर फेकल्या. ईडीच्या अधिकाऱ्यांनी तात्काळ त्या बॅगा ताब्यात घेतल्या आणि घटनास्थळी विखुरलेल्या नोटांचे बंडल गोळा केले,” असे एका अधिकाऱ्याने सांगितले.
सनटेक सिटी प्रकल्पाच्या संबंधात ईडीने मोहाली आणि चंदीगडमधील १२ ठिकाणी शोधमोहीम राबवली आहे. अजय सेहगल, एबीएस टाउनशिप्स प्रायव्हेट लिमिटेड, अॅटलस बिल्डर्स, धीर कन्स्ट्रक्शन्स आणि त्यांच्या साथीदारांवर जीएमएडीए (GMADA) कडून सीएलयू (CLU) परवाने मिळवण्यात मोठा घोटाळा केल्याचा आणि जनतेची शेकडो कोटी रुपयांची फसवणूक केल्याचा आरोप आहे.
हे ही वाचा:
दहशतवादाचा पराभव करण्याचा भारताचा निर्धार
सुवेंदू अधिकारी यांच्या पीएच्या हत्येत बनावट नंबर प्लेटच्या गाडीचा वापर
“भारताची प्रतिक्रिया दहशतवाद विरोधात ठाम आणि अचूक!”
सत्ता बदलली; बदल्याचे राजकारण सुरू? सुवेदू यांच्या ‘पीए’ची हत्या
जीएमएडीए शुल्क न भरलेल्या बिल्डरांना मदत केल्याचा आणि त्यांना राजकीय संरक्षण दिल्याचा आरोप असलेल्या नितीन गोहल यांच्या निवासस्थानी ईडी शोधमोहीम राबवत आहे. ते मुख्यमंत्री भगवंत मान यांचे ओएसडी राजबीर घुमन यांचे निकटचे सहकारी आहेत. नितीन गोहल हे पंजाब सीएमओसाठी संपर्क अधिकारी म्हणून काम करत असल्याचाही संशय आहे.
