बहिणीशी वाद घालणाऱ्यांवर झाडल्या गोळ्या; एकाचा मृत्यू, दोघे जखमी

ठाणे जिल्ह्यातील मुंब्रा परिसरातून धक्कादायक घटना समोर आली आहे. गुरुवारी (२ मार्च) सकाळी एका व्यक्तीने आपल्या बहिणीला छेडछाडीतून वाचवण्याच्या प्रयत्नात तीन जणांवर गोळीबार केला. या घटनेत एकाचा मृत्यू झाला असून दोघे जखमी झाले आहेत. पोलिसांनी आरोपी आणि संबंधित महिलेला अटक केली आहे.

पोलिसांच्या माहितीनुसार, ही घटना सकाळी सुमारे ११:३० वाजता मुंब्रा बायपास रोडवरील सुमंताई चव्हाण हिंदी प्रायमरी स्कूलच्या बाहेर घडली. मृत व्यक्तीची ओळख २९ वर्षीय अकबर अब्दुल शेख अशी झाली असून त्याला हनुवटीवर गोळी लागली होती. तर ५६ वर्षीय अब्दुल हसन शेख आणि २९ वर्षीय समीर अहमद शेख यांच्या खांदा आणि हाताला गोळ्या लागल्या असून त्यांच्यावर कालसेकर रुग्णालयात उपचार सुरू आहेत.

प्राथमिक तपासात समोर आले की, हे तिघेही रोजंदारीवर काम करणारे मजूर होते आणि गुरुवारी सकाळी शाळेच्या परिसरात आले होते. त्यापैकी एक जण परिसरातील केळीच्या झाडावरून फळ तोडत होता, ज्याला शाळेतील महिला कर्मचारी अनवारा बीबी शेख यांनी विरोध केला. यावरून वाद वाढला आणि महिलेबरोबर कथित छेडछाड व मारहाण करण्यात आली.

अनवारा बीबी शेख या शाळेत हाऊसकीपिंग कर्मचारी म्हणून काम करतात. त्यांनी पोलिसांना सांगितले की, या लोकांशी यापूर्वीही वाद झाले होते. गुरुवारी परिस्थिती बिघडल्यानंतर त्यांनी ५१ वर्षीय जयन शिवानंदन नायर यांना फोन करून मदत मागितली. जयन नायर हा व्यवसायाने ट्रक चालक असून, अनवारा यांच्या कुटुंबाने त्याला लहानपणी वाढवले होते. तो कारने घटनास्थळी पोहोचला आणि त्याच्याकडे असलेल्या भरलेल्या रिव्हॉल्व्हरमधून तिघांवर गोळीबार करून फरार झाला.

हे ही वाचा:

पश्चिम आशिया संकटावर काँग्रेस दुभंगली

भारत-दक्षिण कोरियामध्ये जहाजबांधणी क्षेत्रातील कौशल्य विकासासाठी करार

वाढत्या उष्णतेत शरीराला थंडावा देणारा ‘खरबूज’! आयुर्वेदात काय म्हटले आहे?

मात्र, पोलिसांनी तातडीने कारवाई करत नायरला घटनास्थळापासून सुमारे ४ किलोमीटर अंतरावर शिळफाटा परिसरातून अटक केली आणि त्याच्याकडून शस्त्र जप्त केले. चौकशीत नायरने दावा केला की, त्याला ही रिव्हॉल्व्हर गुजरातमध्ये रस्त्याच्या कडेला एका बॅगमध्ये सापडली होती, जी त्याने स्वतःजवळ ठेवली होती. मुंब्रा पोलीस ठाण्याचे वरिष्ठ पोलीस निरीक्षक अनिल शिंदे यांनी सांगितले की, नायर आणि अनवारा या दोघांविरुद्ध खून आणि आर्म्स अ‍ॅक्ट अंतर्गत गुन्हा दाखल करण्यात आला आहे. पोलिसांकडून पुढील तपास सुरू असून शस्त्र नेमके कुठून आले आणि यापूर्वी ते इतर कोणत्या गुन्ह्यात वापरण्यात आले आहे का, याचाही शोध घेतला जात आहे.