पंतप्रधान मोदींच्या दौऱ्यापूर्वी जिलेटिन स्टिक सापडल्याप्रकरणी सहा पोलिस निलंबित

पंतप्रधान नरेंद्र मोदी यांच्या १० मे रोजी बेंगळुरू येथील आर्ट ऑफ लिव्हिंग केंद्राच्या दौऱ्यापूर्वी संशयास्पद जिलेटिन स्टिक आढळल्याच्या प्रकरणात कर्नाटक पोलिसांनी मोठी कारवाई केली आहे. सहा पोलिस कर्मचाऱ्यांना निलंबित करण्यात आले असून या कर्मचाऱ्यांवर कर्तव्यात हलगर्जीपणा केल्याचा आरोप आहे. बेंगळुरू दक्षिण जिल्ह्याचे पोलिस अधीक्षक आर. श्रीनिवास गौडा यांनी एका उपनिरीक्षकासह (सब-इन्स्पेक्टर), एका सहाय्यक उपनिरीक्षकासह (एएसआय) आणि चार पोलिस शिपायांवर निलंबनाची कारवाई केली. पंतप्रधानांच्या दौऱ्यापूर्वी सुरू असलेल्या सुरक्षा तपासणी आणि पाहणी मोहिमेदरम्यान हे प्रकरण उघडकीस आले.

पोलिसांच्या माहितीनुसार, तपासणीदरम्यान एका पोलिस शिपायाला रस्त्याच्या कडेला संशयास्पद साहित्य आढळले. त्या ठिकाणाहून दोन जिलेटिन स्टिक, एक सर्किट आणि एक टाइमर जप्त करण्यात आला. हे साहित्य पंतप्रधानांच्या मुख्य कार्यक्रमस्थळापासून सुमारे ३ किलोमीटर अंतरावर असलेल्या पदपथाजवळ सापडले. या घटनेचे गांभीर्य लक्षात घेऊन एनआयए देखील तपासात सहभागी झाली आहे. हे स्फोटक साहित्य त्या ठिकाणी कसे पोहोचले आणि यामागे कोणते मोठे षड्यंत्र होते का, याचा शोध सुरक्षा यंत्रणा घेत आहेत.

अद्याप कोणत्याही दहशतवादी कटाची अधिकृत पुष्टी झालेली नसली, तरी पंतप्रधानांच्या सुरक्षेशी संबंधित प्रकरण असल्यामुळे तपास यंत्रणा अत्यंत सावधगिरीने चौकशी करत आहेत. कडक सुरक्षा व्यवस्था असतानाही हे साहित्य त्या भागात कसे पोहोचले आणि स्थानिक स्तरावरील सुरक्षा प्रोटोकॉलमध्ये नेमकी कुठे त्रुटी राहिली, याचाही तपास सुरू आहे.

हे ही वाचा:

मुलुंड डम्पिंग ग्राउंडवरील बायो-रिमेडिएशन अंतिम टप्प्यात; ६० एकर जमीन होणार पुनर्प्राप्त

पुनर्वसनाबाबत अनिश्चितता; दिल्ली जिमखाना क्लबची सरकारकडे ‘ही’ विनंती

जम्मू- काश्मीरमधील ११६ अमली पदार्थ तस्करांचे पासपोर्ट होणार रद्द

मुंबई पोर्ट प्राधिकरणाकडून आर्थिक वर्षात ७५.१५ दशलक्ष टन मालवाहतूकीची हाताळणी

घटनेनंतर संपूर्ण सुरक्षा व्यवस्थेचा आढावा घेण्यास सुरुवात करण्यात आली आहे. वरिष्ठ अधिकाऱ्यांनी संबंधित पोलिस कर्मचाऱ्यांच्या भूमिकेची चौकशी केली असता प्रथमदर्शनी निष्काळजीपणा आढळल्याने त्यांना निलंबित करण्यात आले. पंतप्रधान नरेंद्र मोदी यांचा हा दौरा बेंगळुरूच्या बाहेरील भागातील आर्ट ऑफ लिव्हिंग केंद्रात आयोजित श्री श्री रवी शंकर यांच्या ७० व्या वाढदिवसानिमित्त आयोजित कार्यक्रमासाठी होता. या कार्यक्रमाला मोठ्या संख्येने नागरिक आणि मान्यवर उपस्थित राहण्याची शक्यता होती.