उत्तर प्रदेश दहशतवादविरोधी पथकाने (ATS) पाकिस्तानस्थित दहशतवादी संघटना जैश-ए-मोहम्मदशी संबंधित असल्याच्या संशयावरून मोहम्मद जफर नावाच्या तरुणाला अटक केली आहे. बिहारमधील पूर्णिया जिल्ह्यातील मिरगंज गावचा रहिवासी असलेला जफर हा मदरशाच्या नावाखाली देणगी गोळा करून ती भारतात जिहाद घडवून आणण्याच्या उद्देशाने पाकिस्तानस्थित दहशतवादी संघटनेकडे पाठवत असल्याची माहिती एटीएसला मिळाली होती.
एटीएसच्या तपासानुसार, जफर हा जैश-ए-मोहम्मदचा प्रमुख मौलाना मसूद अझहरच्या विचारांनी प्रभावित झाला होता. सोशल मीडियावर मसूद अझहरची वक्तव्ये आणि कथित प्रक्षोभक जिहादी भाषणे शेअर करून तो लोकांना हिंसक जिहादमध्ये सहभागी होण्यासाठी प्रवृत्त करत असल्याचा आरोप आहे.
एटीएसच्या माहितीनुसार, जफर यापूर्वी मेरठमधील एका मदरशात शिकत होता. याच काळात त्याने मुजाहिदीनच्या कथित हौतात्म्याबाबतचे साहित्य वाचले आणि त्यांच्यासारखे बनण्याची इच्छा व्यक्त केली होती. त्याच्या सोशल मीडिया खात्यांच्या तपासात चेहरा झाकलेले फोटो वापरून जिहाद आणि खिलाफतशी संबंधित संदेश प्रसारित केल्याचे समोर आल्याचा एटीएसचा दावा आहे.
तपासादरम्यान जफरच्या मोबाइल फोनमध्ये अनेक पाकिस्तानी जिहादी व्हॉट्सअॅप ग्रुप आढळल्याचे एटीएसने सांगितले. या ग्रुपमध्ये जिहाद तसेच देणगी गोळा करण्यासंदर्भात चर्चा होत असल्याचे तपासात समोर आले. एटीएसच्या म्हणण्यानुसार, जफर जैशशी संबंधित एका जिहादी ग्रुपच्या माध्यमातून पाकिस्तानी हँडलरच्या संपर्कात आला. पाकिस्तानी बँक खात्यात प्रवेश मिळवण्यात अडचण आल्यानंतर त्याने या हँडलरकडे बायनान्स खात्याची मागणी केली. त्यानंतर तो इतर पाकिस्तानी संशयितांच्या संपर्कात आला आणि बायनान्सच्या माध्यमातून USDT तसेच बिझनेस अकाउंट UPI द्वारे अनेक वेळा निधी हस्तांतरित केल्याचा आरोप आहे.
हे ही वाचा:
बँक खाते भाड्याने देणं पडलं महागात; २५ कोटींचे व्यवहार उघड
सोरेन सरकार झुकलं; JSSC-CGLसह TDPLच्या परीक्षा रद्द
हिंद महासागरावर भारताचा ‘ड्रोन वॉच’; नौदलाला मिळणार MQ-9B सी गार्डियनची ताकद
भाजपाची ‘नबीन’ जबाबदारी, गोयल कोषाध्यक्ष, तावडे महासचिव
एटीएसने दिलेल्या माहितीनुसार, चौकशीदरम्यान मोहम्मद जफरने आपल्यावरील आरोपांशी संबंधित गुन्ह्यांची कबुली दिली आहे. त्याच्याविरोधात भारतीय न्याय संहिता/फौजदारी कायद्यातील संबंधित तरतुदी तसेच यूएपीए कायद्याच्या कलम १८ आणि ३८ अंतर्गत गुन्हा दाखल करण्यात आला आहे.