दिल्ली पोलिसांच्या स्पेशल सेलने पाकिस्तान समर्थित आंतरराष्ट्रीय दहशतवादी आणि गुन्हेगारी नेटवर्कविरोधात मोठी कारवाई करत सात संशयितांना अटक केली आहे. अटक करण्यात आलेले आरोपी कुख्यात गुंड ते दहशतवादी बनलेल्या शहजाद भट्टी आणि त्याचा सहकारी अजमल गुज्जर यांच्याशी संबंधित असल्याचा पोलिसांचा दावा आहे. या कारवाईमुळे संभाव्य दहशतवादी कट उधळण्यात यश आल्याचे सांगितले जात आहे.
तपासादरम्यान पोलिसांनी आरोपींकडून मोठ्या प्रमाणात शस्त्रे, दारुगोळा तसेच महत्त्वाच्या ठिकाणांची टेहळणी (रेकी) करण्यात आल्याचे दर्शवणारे व्हिडिओ जप्त केले आहेत. या नेटवर्कचा वापर करून भारतात दहशतवादी कारवाया घडवून आणण्याचा कट रचला जात असल्याचा संशय सुरक्षा यंत्रणांनी व्यक्त केला आहे.
अटक करण्यात आलेल्यांची ओळख लोणी, गाझियाबाद येथील अनस उर्फ अनस त्यागी (वय २६); लोणी येथीलच मोहित उर्फ योगी (वय २६); टेक्नो सिटी, गाझियाबाद येथील दीपक उर्फ दीपक अग्रोला; लोणी येथील आरिफ उर्फ प्रधान; पंजाबमधील फतेहगड साहिब येथील करणवीर सिंग; टेक्नो सिटी येथील जतन; आणि लोणी, गाझियाबाद येथील साबिर अशी पटली आहे. अनेक आरोपींची यापूर्वीची गुन्हेगारी पार्श्वभूमी असून, त्यात हत्या, दरोडा, खुनाचा प्रयत्न, बेकायदेशीर शस्त्र बाळगणे आणि अमली पदार्थांशी संबंधित गुन्ह्यांचा समावेश आहे.
या कारवाईदरम्यान, पोलिसांनी पाच अत्याधुनिक सेमी-ऑटोमॅटिक पिस्तूल, ४१ जिवंत काडतुसे, सात मोबाईल फोन, एक स्कॉर्पिओ एसयूव्ही आणि अवैध व्यवहारांसाठी वापरल्याचा आरोप असलेल्या अनेक बँक खात्यांचा तपशील जप्त केला. अधिकाऱ्यांनी सांगितले की, जप्त केलेल्या फोनमध्ये चॅट्स, व्हॉइस नोट्स आणि इतर डिजिटल पुरावे आढळले, जे संशयितांना शहजाद भट्टी आणि अजमल गुज्जर यांच्याशी जोडतात.
प्राथमिक तपासात या टोळीचे पाकिस्तानस्थित सूत्रधारांशी संबंध असल्याचे समोर आले आहे. शस्त्रे, दारुगोळा आणि अमली पदार्थांची तस्करी पंजाबमार्गे भारतात करण्यात येत होती. त्यानंतर हे साहित्य दिल्ली-एनसीआरसह विविध भागांत पोहोचवले जात असल्याची माहिती तपासातून समोर आली आहे.
दिल्ली पोलिसांच्या स्पेशल सेलने अनेक दिवसांच्या गुप्त माहिती आणि तांत्रिक निरीक्षणाच्या आधारे ही कारवाई केली. अटक करण्यात आलेले सातही जण या नेटवर्कचे महत्त्वाचे सदस्य असल्याचे मानले जात असून त्यांच्याकडून अधिक चौकशी सुरू आहे. या चौकशीतून आणखी काही साथीदार, आर्थिक व्यवहार आणि सीमापार संपर्क उघड होण्याची शक्यता व्यक्त केली जात आहे.
हे ही वाचा:
आत्मनिर्भर भारताची विक्रमी भरारी! संरक्षण उत्पादन १.७८ लाख कोटींवर
‘इंडो-पॅसिफिक’ऐवजी पुन्हा ‘पॅसिफिक कमांड’! अमेरिकेचा निर्णय
पंढरपुरातील श्री विठ्ठल-रुक्मिणी मूर्तींवरील रासायनिक लेपनास विरोध
जून २०२२ ची पुनरावृत्ती होणार? ठाकरे गटाचे खासदार फुटीच्या उंबरठ्यावर
सुरक्षा यंत्रणांच्या मते, गुन्हेगारी टोळ्या आणि दहशतवादी संघटनांमधील वाढते संबंध ही गंभीर चिंतेची बाब बनली आहे. अशा नेटवर्कचा वापर शस्त्रांची तस्करी, आर्थिक व्यवहार आणि दहशतवादी कारवायांसाठी केला जात असल्याने या प्रकरणाला विशेष महत्त्व प्राप्त झाले आहे. दिल्ली पोलिसांच्या या कारवाईमुळे संभाव्य मोठा धोका टळल्याचे मानले जात आहे.
