मुलुंड येथील डीमार्टमध्ये ‘लेअरिंग’ नावाचा नवा फंडा वापरून चोरी करण्याचा प्रयत्न करणाऱ्या दोन महिलांना पोलिसांनी रंगेहाथ पकडले आहे. अंगावर कपड्यांचे थर चढवून वस्तू लपवण्याचा त्यांचा हा ‘अजब’ प्रयत्न त्यांच्याच अंगलट आला आणि त्यांच्या विचित्र वेशभूषेमुळे त्यांचा भांडाफोड झाला.
ही घटना गुरुवारी रात्री लिंक रोडवरील डीमार्टमध्ये घडली. स्टोअर मॅनेजर सुनील गुप्ता यांनी दिलेल्या माहितीनुसार, कोमल विश्वकर्मा (३०) आणि सुमन विश्वकर्मा (२६) नावाच्या दोन महिलांचा पोशाख त्यांना संशयास्पद वाटला. सामान्यतः नसतात अशा पद्धतीने त्यांचे शरीर फुगलेले दिसत होते, जणू काही त्यांनी एकावर एक अनेक कपडे परिधान केले होते.
गुप्ता यांनी तातडीने आपल्या सहकाऱ्यांच्या मदतीने त्यांना थांबवले. सुरुवातीला त्यांनी कपडे काढण्यास नकार दिला. त्यावेळी स्टोअरमध्ये महिला कर्मचारी नसल्यामुळे गुप्ता यांनी थेट मुलुंड पोलिसांशी संपर्क साधला. महिला पोलिसांच्या उपस्थितीत या दोघींना ट्रायल रूममध्ये नेण्यात आले. तिथे साक्षीदारांसमोर त्यांनी चोरलेल्या वस्तू बाहेर काढल्या आणि त्या पाहता सगळेच अवाक् झाले.
हे ही वाचा:
बीड जन्म प्रमाणपत्र घोटाळा, २७०२ प्रमाणपत्र रद्द!
जम्मू-काश्मीरच्या दोडा येथे ढगफुटी!
भारत-जपान संबंध ‘मेड फॉर इच अदर’ !
परदेशी गुंतवणूक प्रकरणात ईडीची छापेमारी
त्यांनी चोरलेल्या वस्तूंमध्ये १८ कपडे आणि १६ ॲक्सेसरीज, पादत्राणे, तसेच अनेक खाद्यपदार्थ आणि सौंदर्यप्रसाधनांचा समावेश होता. या सर्व वस्तू त्यांनी अंगावर एकावर एक कपडे घालून लपवल्या होत्या. या दोघींविरुद्ध भारतीय न्याय संहिता २०२३ च्या कलम ३(५) आणि ३०३(२) नुसार गुन्हा दाखल करण्यात आला असून, पोलीस या प्रकरणाचा पुढील तपास करत आहेत. या घटनेने चोरीच्या नव्या तंत्राचा पर्दाफाश झाला आहे. त्यामुळे इतर दुकानांकडूनही सतर्कता बाळगण्याचे आवाहन करण्यात आले आहे.
