ब्रिटनचे राजा चार्ल्स तिसरे यांचे धाकटे भाऊ प्रिन्स अँड्र्यू (ड्युक ऑफ यॉर्क) यांना ‘मिसकंडक्ट इन पब्लिक ऑफिस’ म्हणजेच सार्वजनिक पदावर असताना गैरवर्तन केल्याच्या आरोपावरुन अटक करण्यात आली आहे. १९ फेब्रुवारी २०२६ रोजी ही कारवाई करण्यात आली. या घटनेमुळे ब्रिटनच्या राजघराण्यात मोठी खळबळ उडाली आहे.
थेम्स व्हॅली पोलीस यांनी दिलेल्या माहितीनुसार, 60 वर्षांवरील एका व्यक्तीला ताब्यात घेण्यात आले असून त्याच्याविरुद्ध सार्वजनिक पदाचा गैरवापर केल्याचा संशय आहे. अधिकृत निवेदनात नाव जाहीर करण्यात आले नसले तरी ब्रिटनमधील प्रमुख माध्यमांनी ही व्यक्ती प्रिन्स अँड्र्यू असल्याचे स्पष्ट केले आहे. सध्या पोलीस त्यांची चौकशी करत आहेत.
हे ही वाचा:
भारत एआय क्षेत्रात जागतिक नेतृत्वासाठी सज्ज
मुंबई शिक्षण समितीच्या अध्यक्षपदी राजेश्री राजेश शिरवडकर
बांगलादेशमध्ये सर्व वीजा सेवा पुन्हा सुरू होणार
मोबाईल डेटाप्रमाणे स्वस्तात मिळणार ‘जिओ एआय’!
प्रिन्स अँड्र्यू यांचे नाव यापूर्वीही अमेरिकेतील कुख्यात गुन्हेगार जेफ्री एपस्टीन याच्याशी जोडले गेले होते. एपस्टीनवर अल्पवयीन मुलींच्या लैंगिक शोषणाचे गंभीर आरोप होते. या प्रकरणात अँड्र्यू यांच्या मैत्रीमुळे आणि संपर्कांमुळे मोठा वाद निर्माण झाला होता. 2019 मध्ये या वादानंतर त्यांनी सर्व सार्वजनिक जबाबदाऱ्या सोडल्या होत्या. त्यानंतर त्यांना अनेक राजकीय आणि अधिकृत सन्मानांपासून दूर करण्यात आले.
‘मिसकंडक्ट इन पब्लिक ऑफिस’ हा ब्रिटनमध्ये गंभीर गुन्हा मानला जातो. सार्वजनिक पदावर असताना अधिकारांचा गैरवापर करणे, कर्तव्य पार पाडताना कायद्याचे उल्लंघन करणे किंवा चुकीचे निर्णय घेणे या गोष्टी या गुन्ह्यात येतात. दोष सिद्ध झाल्यास कठोर शिक्षा होऊ शकते. मात्र सध्या अँड्र्यू यांना केवळ चौकशीसाठी अटक करण्यात आली असून अंतिम निर्णय न्यायालयीन प्रक्रियेनंतरच होणार आहे.
राजा चार्ल्स तिसरे यांनी या घटनेवर प्रतिक्रिया देताना सांगितले की, कायद्याची प्रक्रिया योग्य पद्धतीने पार पडली पाहिजे. राजघराणे तपासात पूर्ण सहकार्य करेल, असेही त्यांनी स्पष्ट केले. ब्रिटनचे पंतप्रधान कीअर स्टार्मर यांनीही “कायद्यापुढे सर्वजण समान आहेत” असे स्पष्ट करत या प्रकरणात कोणालाही विशेष वागणूक दिली जाणार नाही, असे सांगितले.
या अटकेमुळे ब्रिटिश राजघराण्याची प्रतिमा पुन्हा एकदा चर्चेत आली आहे. यापूर्वीच प्रिन्स अँड्र्यू वादांमुळे सार्वजनिक जीवनापासून दूर गेले होते. आता या नव्या आरोपांमुळे त्यांच्यावरील दबाव अधिक वाढला आहे. पुढील काही दिवसांत पोलीस तपास आणि न्यायालयीन प्रक्रिया यावर या प्रकरणाचे भवितव्य ठरणार आहे.
