अमेरिका आणि इस्रायलने इराणवरील हल्ले तीव्र केले असून तणाव आणखी शिगेला पोहचत आहे. अशातच आता इराणच्या नतांज अणु केंद्रावर हल्ला करण्यात आल्याची माहिती समोर आली आहे. शनिवार, २१ मार्च रोजी सकाळी अमेरिका आणि इस्रायलच्या हवाई हल्ल्यात नतांज अणु केंद्र प्रकल्पाला लक्ष्य करण्यात आले. मात्र, कोणतीही किरणोत्सर्गी गळती (रेडिओऍक्टिव गळती) झालेली नाही आणि प्रकल्पाच्या आसपास राहणाऱ्या लोकांना कोणताही धोका नाही, अशी माहिती समोर आली आहे.
तसनीम न्यूज एजन्सीने प्रसिद्ध केलेल्या निवेदनात संस्थेने म्हटले आहे, “अमेरिका आणि इस्रायली शासनाने शनिवारी सकाळी नतांज एनरिचमेंट कॉम्प्लेक्सला लक्ष्य केले.” तसेच, मध्य ईराणमधील या भागात “रेडिओऍक्टिव (धोकादायक अणु) गळती झाल्याची कोणतीही माहिती नाही,” असेही स्पष्ट करण्यात आले आहे. अमेरिकेचे अध्यक्ष डोनाल्ड ट्रम्प यांनी मध्य पूर्वेतील लष्करी कारवाया “मागे घेण्याचा” विचार करत असल्याचे सांगितल्यानंतर दुसऱ्याच दिवशी हा हल्ला झाला आहे, तर दुसरीकडे अमेरिकेने या प्रदेशात आणखी तीन हल्ला करणारी जहाजे आणि सुमारे २,५०० अतिरिक्त मरीन सैनिक पाठवले आहेत.
हे ही वाचा:
गौरक्षक ‘फरसा वाले बाबां’च्या मृत्यूनंतर दिल्ली-आग्रा महामार्ग जाम
फ्लिपकार्टला मोठा धक्का! IPOपूर्वी ग्रुप CFO श्रीराम वेंकटरामन यांचा राजीनामा
धुरंधर २ मुळे अभिनेता प्रकाश राज अस्वस्थ, रामचरण, अल्लू अर्जुनवर टीका
तेहरानच्या आग्नेयेला सुमारे २२० किलोमीटर (१३५ मैल) अंतरावर असलेला नतांज प्रकल्प, जून २०२५ मध्ये इस्रायल आणि इराण यांच्यात झालेल्या १२ दिवसांच्या युद्धातील मुख्य लक्ष्यांपैकी एक होता, ज्यात नंतर अमेरिकाही सामील झाली होती, आणि सध्याच्या संघर्षादरम्यानही तो लक्ष्य करण्यात आला आहे.
युद्धाच्या पहिल्या आठवड्यात इराणच्या मुख्य युरेनियम संवर्धन केंद्र, नतांजवरही हल्ला झाला होता आणि उपग्रहाद्वारे घेतलेल्या छायाचित्रांमध्ये अनेक इमारतींचे नुकसान झाल्याचे दिसून आले. संयुक्त राष्ट्रांच्या अणुऊर्जा देखरेख संस्थेने म्हटले आहे की, त्या पहिल्या हल्ल्यातून कोणतेही किरणोत्सर्गी परिणाम अपेक्षित नाहीत.
