“भारताला शिक्षा करायची नाही, पण…” अमेरिकेचे ऊर्जा सचिव काय म्हणाले?

रशियाकडून तेल खरेदी करण्याबाबत भारताच्या निर्णयावरून अमेरिका आणि भारत यांच्यामधील संबंध ताणले गेले आहेत. रशियाकडून भारताने तेल खरेदी करू नये यासाठी अमेरिकेने भारतावर अतिरिक्त शुल्क आकारले आहे. तर, भारताने निर्णय बदलावा यासाठी सातत्याने अमेरिकेकडून प्रयत्न सुरू आहेत. अशातच आता अमेरिकेचे ऊर्जा सचिव क्रिस राईट यांनी भारताला रशियन तेल खरेदीचा पुनर्विचार करण्याचे आवाहन केले आहे.

तेल खरेदीसाठी नवी दिल्लीकडे भरपूर पर्यायी स्रोत आहेत, असे राईट यांनी सुचवले आहे. तसेच त्यांनी असा युक्तिवाद केला की, रशियन कच्चे तेल खरेदी केल्याने अप्रत्यक्षपणे युक्रेनमधील अत्याचारांना निधी मिळतो. राईट म्हणाले की, “आम्हाला भारताला शिक्षा करायची नाही. तुम्ही जगभरातील इतर देशांकडून तेल खरेदी करू शकता, पण रशियन तेल नको आणि हीच आमची भूमिका आहे. अमेरिकेकडे विकण्यासाठी तेल आहे, तसेच इतर अनेकांकडेही आहे,” असे राईट यांनी न्यू यॉर्क फॉरेन प्रेस सेंटरमध्ये पत्रकार परिषदेत एका प्रश्नाच्या उत्तरात सांगितले. जगात अनेक तेल निर्यातदार आहेत. भारताला रशियन तेल खरेदी करण्याची गरज नाही. भारत रशियन तेल खरेदी करतो कारण ते स्वस्त आहे. कोणीही रशियन तेल खरेदी करू इच्छित नाही; त्यांना ते सवलतीच्या दरात विकावे लागते, असे ते पुढे म्हणाले.

राईट यांचे हे विधान अमेरिकेने भारतीय आयातीवरील शुल्क ५० टक्के वाढवले असताना आले आहे. रशियन तेल विक्रीत सवलतीमुळे मॉस्कोच्या लष्करी मोहिमेला निधी मिळतो, असा आरोप झाल्यानंतर हा निर्णय घेण्यात आला आहे. दरम्यान, भारताने असे म्हटले आहे की त्यांची ऊर्जा रणनीती राष्ट्रीय हित आणि बाजारातील गतिमानतेनुसार चालते. पाश्चात्य निर्बंधांमुळे सवलतीच्या दरात रशियन तेल मिळत असल्याने भारताने हा पर्याय निवडला आहे.

हे ही वाचा : 

रेल्वेवरून डागता येणार क्षेपणास्त्र; ‘अग्नी-प्राईम’ची यशस्वी चाचणी

लेहमधील हिंसक आंदोलनासाठी सोनम वांगचुक जबाबदार!

‘आय लव्ह महादेव’ पोस्टवरून गुजरातमध्ये संघर्ष, दगडफेक, वाहने जाळली!

भारत विरुद्धच्या सामन्यात पाक खेळाडूंच्या चिथावणीखोर हावभावांविरुद्ध आयसीसीकडे तक्रार

व्हाईट हाऊसच्या अधिकाऱ्याने सांगितले की, त्यांना विश्वास आहे की भारत युद्ध संपवण्याच्या अमेरिकेच्या ध्येयात सामील आहे आणि वॉशिंग्टन नवी दिल्लीला जागतिक ऊर्जा व्यापारात एक मित्र आणि प्रमुख भागीदार म्हणून पाहतो. राईट यांनी अधोरेखित केले की अमेरिका भारतासोबत नैसर्गिक वायू, कोळसा, अणुऊर्जा अशा अनेक क्षेत्रांमध्ये ऊर्जा सहकार्य वाढविण्यास उत्सुक आहे.