इंडोनेशियात भूकंपाचा धक्का

अमेरिकेच्या भूवैज्ञानिक सर्वेक्षण विभागाने (USGS) दिलेल्या माहितीनुसार, गुरुवारी इंडोनेशियाच्या पापुआ प्रांतात ६.७ तीव्रतेचा भूकंप झाला. यूएसजीएसच्या मते, भूकंपाचे केंद्र पृथ्वीच्या पृष्ठभागाखाली सुमारे ७० किलोमीटर (४३.५ मैल) खोलीवर होते. पॅसिफिक सुनामी वॉर्निंग सेंटरने भूकंपानंतर सुनामीचा कोणताही इशारा जारी केलेला नाही. यूएसजीएसच्या माहितीनुसार, भूकंपाचे केंद्र अबेपुरा शहरापासून सुमारे २०० किलोमीटर अंतरावर होते, ज्याची लोकसंख्या ६२ हजार पेक्षा जास्त आहे. इंडोनेशियाच्या हवामान, जलवायू आणि भूभौतिकी एजन्सी (BMKG) नुसार, भूकंपाची तीव्रता ६.६ मोजली गेली, आणि तो सारमी-पापुआच्या उत्तर-पश्चिमेस सुमारे ६१ किलोमीटरवर झाला. याआधी, १० ऑक्टोबर रोजी, दक्षिण फिलिपाइन्सच्या किनाऱ्यावर दोन शक्तिशाली भूकंप झाले होते, ज्यांनंतर फिलिपाइन्स आणि इंडोनेशिया दोन्हींसाठी सुनामीचा इशारा देण्यात आला होता.

त्या भूकंपात किमान सात जणांचा मृत्यू झाला होता, आणि भूकंपकेंद्राजवळील शहरांमध्ये पायाभूत सुविधांचे नुकसान झाले होते. इंडोनेशिया हा प्रशांत महासागराच्या “रिंग ऑफ फायर” (Ring of Fire) वर वसलेला देश आहे — जिथे टेक्टॉनिक प्लेट्स एकमेकांना धडकतात, त्यामुळे येथे भूकंप वारंवार होतात. ही पट्टी जपानपासून दक्षिण-पूर्व आशियामार्गे प्रशांत महासागराच्या खोऱ्यापर्यंत पसरलेली आहे.

हेही वाचा..

भारत जगातील तिसरी सर्वात मोठी अर्थव्यवस्था बनण्यासाठी सज्ज

“भारताचे मॉस्कोसोबतचे ऊर्जा सहकार्य हे…” ट्रम्प यांच्या दाव्यावर रशियाने काय म्हटले?

जदयूची दुसरी यादी जाहीर

मुख्यमंत्री भूपेंद्र पटेल यांच्या मंत्रिमंडळाचा विस्तार

जानेवारी २०२१ मध्ये सुलावेसी येथे झालेल्या ६.२ तीव्रतेच्या भूकंपात १०० हून अधिक लोक मृत्युमुखी पडले होते, तर हजारो लोक बेघर झाले होते. यापूर्वी २०१८ मध्ये पालू येथे ७.५ तीव्रतेचा भूकंप आणि त्यानंतर आलेल्या सुनामीत २,००० पेक्षा जास्त लोकांचा मृत्यू झाला होता. २००४ मध्ये आचे प्रांतात ९.१ तीव्रतेचा भूकंप झाला होता, ज्यामुळे प्रचंड सुनामी आली आणि फक्त इंडोनेशियामध्येच १,७०,००० पेक्षा जास्त लोकांचा जीव गेला. इंडोनेशिया सतत नैसर्गिक आपत्तींचा सामना करत आला आहे. गेल्या आठवड्यातच, शुक्रवारी पूर्व नुसा तेंगारा प्रदेशातील माउंट लेवोटोबी लाकी-लाकी ज्वालामुखीतून सुमारे १० किलोमीटर (६.२ मैल) उंचीपर्यंत राखेचा प्रचंड ढग उसळताना दिसला होता.