अमेरिकेच्या मध्यस्थीने इस्रायल आणि लेबनॉन यांच्यातील चर्चेची पुढील फेरी ४ ते ६ ऑगस्ट दरम्यान इटलीची राजधानी रोम येथे होणार असल्याची माहिती अमेरिकेच्या परराष्ट्र विभागाने दिली आहे. या बैठकीत दोन्ही देशांची तांत्रिक पथके शांतता आणि सुरक्षा करारासाठी आराखडा तयार करण्याचा प्रयत्न करणार आहेत. या चर्चेत दक्षिण लेबनॉनमधील पायलट झोनचा विस्तार, उर्वरित सीमावाद सोडविणे आणि गेल्या महिन्यात दोन्ही देशांदरम्यान झालेल्या फ्रेमवर्क कराराची संपूर्ण अंमलबजावणी यावर मुख्य भर असणार आहे.
अमेरिकेच्या परराष्ट्र विभागातील एका अधिकाऱ्याने सांगितले की, “दक्षिण लेबनॉनमधील पहिल्या पायलट झोनची यशस्वी अंमलबजावणी आणि गेल्या आठवड्यात अध्यक्ष डोनाल्ड ट्रम्प व लेबनॉनचे राष्ट्राध्यक्ष जोसेफ औन यांच्यात झालेल्या सकारात्मक बैठकीनंतर या चर्चेला वेग आला आहे.” रोम येथे होणाऱ्या बैठकीत इस्रायल आणि लेबनॉनची तांत्रिक पथके एकत्र येणार असून अमेरिका या चर्चेत मध्यस्थाची भूमिका बजावत आहे. अधिकाऱ्यांनी सांगितले की, “रोममधील बैठकीत फ्रेमवर्क कराराची पूर्ण अंमलबजावणी, पायलट झोनचा विस्तार, प्रलंबित सीमावाद निकाली काढणे आणि व्यापक शांतता व सुरक्षा करारावर काम करणे यावर भर दिला जाईल.”
दक्षिण लेबनॉनमध्ये लेबनीज सरकारचे नियंत्रण पुन्हा प्रस्थापित करणे हा पायलट झोनचा मुख्य उद्देश आहे. यासोबतच त्या भागात कार्यरत असलेल्या दहशतवादी संघटनांकडील पडताळणी करता येण्याजोगी शस्त्रे नष्ट करण्याचाही या योजनेत समावेश आहे. अधिकाऱ्यांच्या म्हणण्यानुसार, “पहिला पायलट झोन हा प्रत्यक्ष प्रगती साधण्याची, दहशतवादी संघटनांकडील शस्त्रे नष्ट करून लेबनीज सरकारचे नियंत्रण मजबूत करण्याची आणि पुढील टप्प्यांसाठी आवश्यक विश्वास निर्माण करण्याची महत्त्वाची संधी आहे.”
गेल्या आठवड्यात इस्रायली संरक्षण दलाने (IDF) दक्षिण लेबनॉनमधील एका पायलट झोनमधून पहिल्या टप्प्यात माघार घेतली. त्यानंतर बेरूतने इस्रायलवर लेबनीज सशस्त्र दलाच्या कामकाजात अडथळे आणल्याचा आरोप केला आहे. मात्र, अमेरिकेच्या परराष्ट्र विभागाने सत्तेचे हस्तांतरण सुरळीतपणे सुरू असल्याचा दावा केला आहे. पहिल्या पायलट झोनकडे सीमावर्ती इतर भागांमध्ये अशाच प्रकारची व्यवस्था राबविण्यासाठी चाचणी प्रकल्प म्हणून पाहिले जात आहे. अधिकाऱ्यांनी सांगितले की, “या पहिल्या पायलट झोनमधील अनुभवाच्या आधारे पुढील पायलट झोन अधिक प्रभावीपणे राबविता येतील आणि त्यांचा टप्प्याटप्प्याने विस्तार करता येईल.”
हे ही वाचा:
भूस्खलनामुळे जम्मू-श्रीनगर महामार्ग ठप्प; शेकडो भाविक अडकले
फेसबुकवरून मोदींचा व्हिडिओ गायब; मेटाने चूक मान्य करत दिले स्पष्टीकरण
जंतर मंतर आंदोलनात २८७३ गुन्हेगार
अमरनाथ यात्रेवरून परतणारी बस गांदरबलमध्ये उलटली
दरम्यान, रोममधील ही चर्चा इस्रायलमध्ये ऑक्टोबरमध्ये होणाऱ्या नेसेट (संसद) निवडणुकांच्या पार्श्वभूमीवर होत आहे. आगामी निवडणुकांमुळे इस्रायली सैन्याची माघार आणखी गुंतागुंतीची ठरू शकते, तर लेबनॉनला दक्षिण भागात आपल्या सैन्याचे अधिक प्रभावी नियंत्रण हवे असल्याची भूमिका कायम आहे.
