ब्राझीलमध्ये डाव्या विचारसरणीचे लुला दा सिल्व्हा चौथ्यांदा राष्ट्राध्यक्ष

ब्राझीलच्या राष्ट्राध्यक्षपदाच्या निवडणुकीत विद्यमान डाव्या विचारसरणीचे नेते लुईझ इनासिओ लुला दा सिल्वा यांनी ऐतिहासिक विजय मिळवला. त्यांनी उजव्या विचारसरणीचे नेते आणि माजी राष्ट्राध्यक्ष जैर बोल्सोनारो यांचे पुत्र फ्लाव्हियो बोल्सोनारो यांचा पराभव करत चौथ्यांदा राष्ट्राध्यक्षपदाची निवडणूक जिंकली. रविवारी (२५ ऑक्टोबर) झालेल्या दुसऱ्या फेरीतील मतदानात लुला यांना सुमारे ५१.८ टक्के, तर फ्लाव्हियो बोल्सोनारो यांना ४८.२ टक्के मते मिळाली.

निवडणुकीच्या पहिल्या फेरीत फ्लाव्हियो बोल्सोनारो यांनी आघाडी घेतली होती. त्यामुळे दुसऱ्या फेरीत लुला यांच्यासमोर मोठे आव्हान निर्माण झाले होते. मात्र, प्रचाराच्या अंतिम टप्प्यात त्यांनी सोशल मीडिया, जाहीर सभा आणि जनसंपर्काच्या माध्यमातून मतदारांपर्यंत पोहोचण्यावर भर दिला. विशेषतः गरीब आणि कामगार वर्गातील मतदारांचा पाठिंबा त्यांच्यासाठी निर्णायक ठरल्याचे मानले जात आहे.

लुला यांनी यापूर्वी २००३ ते २०१० या काळात दोन कार्यकाळ राष्ट्राध्यक्षपद भूषवले होते. त्यानंतर २०२३ मध्ये त्यांनी पुन्हा सत्तेत पुनरागमन केले. आता चौथ्यांदा निवडणूक जिंकत त्यांनी आपल्या राजकीय कारकिर्दीत आणखी एक महत्त्वाचा टप्पा गाठला आहे. ब्राझीलमध्ये लोकशाही पुनर्स्थापित झाल्यानंतर पहिल्या फेरीत दुसऱ्या क्रमांकावर राहून राष्ट्राध्यक्षपदाची निवडणूक जिंकणारे ते पहिले उमेदवार ठरले आहेत.  निवडणूक प्रचारादरम्यान लुला यांनी गरिबी, आर्थिक विषमता, बेरोजगारी आणि सामाजिक कल्याणाच्या योजनांवर भर दिला होता. कमी उत्पन्न असलेल्या कुटुंबांना मदत, कामगारांचे हक्क आणि जीवनमान उंचावण्यासाठी उपाययोजना करण्याचे आश्वासन त्यांनी दिले.

हे ही वाचा:

नर्मदा नदीकाठी मतदार ओळखपत्रांचा खच

वृक्षतोडीचे ‘फेक नरेटिव्ह’ पसरवून क्लीन एनर्जी रोखू नका!

टेरर फंडिंगप्रकरणी काश्मीरमध्ये चार महिलांसह सहा जणांना अटक

दहिसरमध्ये १३ वर्षीय मुलीचे लैंगिक शोषण; पोक्सोअंतर्गत तरुणाला अटक

मात्र, चौथ्या कार्यकाळात त्यांच्यासमोर अनेक आर्थिक आव्हाने असणार आहेत. वाढते सार्वजनिक कर्ज, महागाईचा दबाव, उच्च व्याजदर आणि नागरिकांवरील कर्जाचा वाढता बोजा यामुळे सरकारसमोर आर्थिक संतुलन राखण्याचे आव्हान असेल. त्याचबरोबर, ब्राझीलच्या संसदेत उजव्या विचारसरणीच्या पक्षांचे वाढलेले बळ लुला यांच्या धोरणांच्या अंमलबजावणीत अडथळे निर्माण करू शकते.