सप्टेंबरमध्ये रशियाचे राष्ट्राध्यक्ष पुतिन येणार भारत दौऱ्यावर

 व्लादिमीर पुतिन यावर्षी भारत दौऱ्यावर येणार आहेत. भारत २०२६ मध्ये ब्रिक्स शिखर परिषद आयोजित करणार असून, त्यात सहभागी होण्यासाठी पुतिन सप्टेंबर २०२६ मध्ये भारतात येतील. दक्षिण आफ्रिकेतील रशियन दूतावासाने सोशल मीडिया प्लॅटफॉर्म ‘एक्स’वर क्रेमलिनचे सहकारी युरी उशाकोव यांच्या हवाल्याने माहिती दिली की, व्लादिमीर पुतिन १२ आणि १३ सप्टेंबर रोजी नवी दिल्लीत होणाऱ्या ब्रिक्स परिषदेत सहभागी होतील. गेल्या एका वर्षात पुतिन यांचा हा दुसरा भारत दौरा असेल.

भारताने १३ जानेवारी २०२६ रोजी ब्रिक्स समूहाचे अध्यक्षपद स्वीकारले होते. त्यानंतर सुमारे १४ जानेवारीला परराष्ट्रमंत्री एस. जयशंकर यांनी परिषदेसाठी अधिकृत थीम, लोगो आणि वेबसाइटचे उद्घाटन केले होते. यापूर्वी डिसेंबर २०२५ मध्ये पुतिन दोन दिवसांच्या भारत दौऱ्यावर आले होते. त्यावेळी त्यांनी पंतप्रधान नरेंद्र मोदी यांची भेट घेतली आणि २३व्या भारत-रशिया वार्षिक शिखर परिषदेत सहभाग घेतला होता. या परिषदेदरम्यान दोन्ही देशांनी आपले संबंध अधिक मजबूत रणनीतिक भागीदारीत रूपांतरित करण्यावर भर दिला होता.

दोन्ही नेत्यांनी भारत-रशिया विशेष आणि विशेषाधिकारप्राप्त रणनीतिक भागीदारी अधिक बळकट करण्याच्या वचनबद्धतेचा पुनरुच्चार केला होता. परस्पर विश्वास, एकमेकांच्या राष्ट्रीय हितांचा आदर आणि रणनीतिक समन्वय या आधारांवर उभ्या असलेल्या या दीर्घकालीन संबंधांचे महत्त्वही अधोरेखित करण्यात आले होते. दोन्ही देशांनी जागतिक शांतता आणि स्थैर्यासाठी या संबंधांचे महत्त्व अधोरेखित करत, समान आणि अविभाज्य सुरक्षेच्या तत्त्वावर आधारित सहकार्य कायम ठेवण्यावर भर दिला होता.

हे ही वाचा:

दिल्ली दंगलीतील आरोपी उमर खालिदचा जामीन फेटाळला

अभिषेक बॅनर्जी यांच्या आईला अनधिकृत बांधकाम प्रकरणी नोटीस

२३ वर्षीय भारतीय वंशाचे तुषार कुमार ठरले ब्रिटनमधील सर्वात युवा महापौर

पाकिस्तानने लक्ष्य केल्याचा दावा केलेले ‘भारतीय एअरबेस’ अस्तित्वातच नाहीत

या परिषदेदरम्यान राजकीय, रणनीतिक, संरक्षण, सुरक्षा, व्यापार, गुंतवणूक, ऊर्जा, विज्ञान-तंत्रज्ञान, अणुऊर्जा, अवकाश, संस्कृती, शिक्षण आणि मानवी सहकार्य अशा विविध क्षेत्रांतील भारत-रशिया संबंधांचे सकारात्मक मूल्यमापन करण्यात आले. राष्ट्राध्यक्ष पुतिन आणि पंतप्रधान मोदी यांनी संतुलित आणि शाश्वत पद्धतीने द्विपक्षीय व्यापार वाढवण्याच्या उद्दिष्टाची पुनर्प्रतिबद्धता व्यक्त केली. यामध्ये रशियाला भारताची निर्यात वाढवणे, औद्योगिक सहकार्य मजबूत करणे, नव्या तंत्रज्ञान व गुंतवणूक भागीदारी निर्माण करणे आणि विशेषतः उच्च तंत्रज्ञान क्षेत्रात सहकार्याचे नवीन मार्ग शोधणे यांचा समावेश होता. तसेच २०३० पर्यंत भारत-रशिया आर्थिक सहकार्याच्या रणनीतिक क्षेत्रांच्या विकासासाठी तयार करण्यात आलेल्या “प्रोग्राम २०३०” चे दोन्ही नेत्यांनी स्वागत केले.