इराणविरोधातील अमेरिकेच्या कारवाईला पाठिंबा न दिल्याने अमेरिकेचे राष्ट्राध्यक्ष डोनाल्ड ट्रम्प यांनी नाटोतील मित्रदेश स्पेनविरोधात आक्रमक भूमिका घेतली आहे. स्पेनसोबतचे सर्व व्यापार संबंध तोडण्याचा इशारा देत ट्रम्प यांनी स्पेनला “वाईट भागीदार” आणि “निरुपयोगी देश” म्हणत कठोर शब्दांत टीका केली. या वक्तव्यामुळे नाटो संघटनेत मतभेद उघडपणे समोर आले असून, अमेरिका आणि स्पेन यांच्यातील राजनैतिक तणाव आणखी वाढला आहे.
अंकारा येथे झालेल्या नाटो शिखर परिषदेत बोलताना ट्रम्प यांनी इराणसोबतचा शांतता करार आता संपल्याचे जाहीर केले. त्याचवेळी इराणविरोधातील अमेरिकेच्या लष्करी मोहिमेला स्पेनने सहकार्य करण्यास नकार दिल्याबद्दल त्यांनी संताप व्यक्त केला. स्पेनने आपल्या लष्करी तळांचा आणि हवाई क्षेत्राचा वापर अमेरिकेला करण्याची परवानगी नाकारल्याचा ट्रम्प यांनी उल्लेख केला.
ट्रम्प यांनी अमेरिकेच्या प्रशासनाला स्पेनसोबतचे व्यापार व्यवहार तातडीने थांबविण्याचे निर्देश दिल्याचा दावा केला. अमेरिकेच्या अर्थ विभागाला स्पेनमधून आयात होणाऱ्या वस्तूंवर निर्बंध घालण्याच्या पर्यायांचा विचार करण्यास सांगितल्याचेही वृत्त आहे. या निर्णयामागे स्पेनचा इराणविरोधी कारवाईला विरोध आणि संरक्षण खर्चाबाबतची भूमिका हे प्रमुख कारण असल्याचे मानले जात आहे.
स्पेनचे पंतप्रधान पेद्रो सांचेझ यांनी मात्र ट्रम्प यांच्या वक्तव्याला फारसे महत्त्व न देता अमेरिका आणि स्पेनमधील संबंध ऐतिहासिकदृष्ट्या मजबूत असल्याचे सांगितले. व्यापार धोरण हे युरोपियन युनियनच्या अखत्यारीतील विषय असल्याने कोणताही निर्णय एकतर्फी होऊ शकत नाही, असेही त्यांनी स्पष्ट केले. तसेच स्पेन नाटोच्या बांधिलकीचे पालन करत राहील, मात्र इराणविरोधातील लष्करी कारवाईत सहभागी होणार नसल्याची भूमिका त्यांनी पुन्हा मांडली.
हे ही वाचा:
शांतता करार संपल्याच्या घोषणेनंतर अमेरिकेचे इराणवर पुन्हा हल्ले
कनेक्टिंग लिंकबाबतचा सगळा खोटारडेपणा समोर आला!
शिवसेनेचे मुजोर नगरसेवक रमेश म्हात्रेंना अटक, डॉक्टर, नर्सेसना केली मारहाण
ना तारीख, ना सुनवाई ४ दिवसात फैसला…
इराणविरोधातील अमेरिकेच्या धोरणाला सर्व नाटो सदस्यांचा पाठिंबा नसल्याचे या घडामोडीतून स्पष्ट झाले आहे. स्पेनने यापूर्वीही अमेरिकेला संयुक्त लष्करी तळांचा वापर करण्यास नकार दिला होता. त्यामुळे ट्रम्प आणि सांचेझ यांच्यातील मतभेद सातत्याने वाढत असून, नाटोमध्येही या मुद्द्यावर दोन गट पडल्याचे चित्र दिसत आहे. अमेरिका आणि स्पेन यांच्यातील व्यापार संबंध बिघडल्यास त्याचा परिणाम केवळ द्विपक्षीय संबंधांवरच नव्हे, तर युरोप-अमेरिका व्यापारावरही होऊ शकतो. आधीच इराण संघर्षामुळे कच्च्या तेलाच्या किमती वाढल्या असून, त्यातच नाटोतील मतभेद तीव्र झाल्यास जागतिक बाजारपेठांमध्ये आणखी अस्थिरता निर्माण होण्याची शक्यता तज्ज्ञांनी व्यक्त केली आहे.