शांतता करार संपल्याच्या घोषणेनंतर अमेरिकेचे इराणवर पुन्हा हल्ले

अमेरिकेचे राष्ट्राध्यक्ष डोनाल्ड ट्रम्प यांनी इराणसोबतचा शांतता करार संपुष्टात आल्याची घोषणा केल्यानंतर अवघ्या काही तासांत अमेरिकेने इराणवर पुन्हा मोठ्या प्रमाणावर हवाई हल्ले केले. या कारवाईनंतर इराणनेही प्रत्युत्तर देत आखाती भागातील अमेरिकन तळ आणि मित्रदेशांना लक्ष्य केले असून, मध्यपूर्वेतील तणाव पुन्हा एकदा शिगेला पोहोचला आहे.

अमेरिकेच्या सेंट्रल कमांडने (CENTCOM) इराणच्या दक्षिण किनारपट्टीवरील अनेक लष्करी ठिकाणांवर कारवाई केल्याची माहिती दिली. या हल्ल्यांचा मुख्य उद्देश होर्मुझ सामुद्रधुनीतील व्यापारी जहाजांवरील हल्ल्यांना प्रत्युत्तर देणे आणि समुद्री वाहतूक सुरक्षित ठेवणे असल्याचे अमेरिकेने स्पष्ट केले आहे.

ट्रम्प यांनी काही दिवसांपूर्वी इराणसोबत युद्धविराम झाल्याचा दावा केला होता. मात्र होर्मुझ सामुद्रधुनीत व्यापारी जहाजांवर झालेल्या हल्ल्यांनंतर त्यांनी हा करार आता “संपला” असल्याचे जाहीर केले. त्यानंतर त्यांनी इराणला आणखी कठोर लष्करी कारवाईचा इशाराही दिला होता. त्याच पार्श्वभूमीवर अमेरिकेने नवीन हवाई हल्ले सुरू केले. अमेरिकेच्या हवाई हल्ल्यांमध्ये इराणमधील बंदर अब्बास, सिरीक आणि बुशेहर परिसरातील लष्करी तळ, क्षेपणास्त्र प्रणाली, रडार केंद्रे आणि इतर धोरणात्मक लक्ष्यांवर निशाणा साधण्यात आल्याचे वृत्त आहे. काही ठिकाणी मोठे स्फोट झाल्याची पुष्टी इराणी माध्यमांनीही केली आहे.

अमेरिकेच्या कारवाईनंतर इराणने आखाती प्रदेशातील अमेरिकेच्या लष्करी तळांना लक्ष्य करत क्षेपणास्त्रे आणि ड्रोन हल्ले केल्याचा दावा करण्यात आला आहे. बहरीन, कुवेत आणि कतार परिसरात हवाई इशारे देण्यात आले असून, काही भागांमध्ये सुरक्षेचा उच्च सतर्कतेचा इशारा जारी करण्यात आला आहे. इराणने अमेरिकेवर युद्धविरामाचे उल्लंघन केल्याचा आरोप केला असून, आपल्या सार्वभौमत्वाचे संरक्षण करण्यासाठी आवश्यक ती प्रत्येक कारवाई केली जाईल, असा इशाराही दिला आहे.

हे ही वाचा:

कनेक्टिंग लिंकबाबतचा सगळा खोटारडेपणा समोर आला!

शिवसेनेचे मुजोर नगरसेवक रमेश म्हात्रेंना अटक, डॉक्टर, नर्सेसना केली मारहाण

ना तारीख, ना सुनवाई ४ दिवसात फैसला…

इराणवर अमेरिकेचा हल्ला; तेलाच्या किमती भडकल्या

होर्मुझ सामुद्रधुनी पुन्हा केंद्रस्थानी

जगातील सुमारे २० टक्के कच्च्या तेलाची वाहतूक होर्मुझ सामुद्रधुनीतून होते. त्यामुळे या भागातील संघर्ष वाढल्यास जागतिक ऊर्जा पुरवठ्यावर गंभीर परिणाम होऊ शकतो. जहाजवाहतूक कंपन्या आणि विमा कंपन्यांनीही या मार्गावरील धोका वाढल्याचा इशारा दिला आहे. अमेरिकेच्या नव्या हल्ल्यांनंतर आंतरराष्ट्रीय बाजारात कच्च्या तेलाच्या किमतींमध्ये वाढ झाली. गुंतवणूकदारांनी मध्यपूर्वेतील संघर्षामुळे तेलपुरवठा विस्कळीत होण्याची शक्यता व्यक्त केली असून, ब्रेंट आणि डब्ल्यूटीआय या दोन्ही निर्देशांकांमध्ये तेजी दिसून आली.