इराणकडून होर्मुझ सामुद्रधुनी पुन्हा बंद!

इराणच्या इस्लामिक रिव्होल्युशनरी गार्ड कॉर्प्सने (आयआरजीसी) होर्मुझ सामुद्रधुनी पुढील आदेश मिळेपर्यंत बंद ठेवण्याची घोषणा केली आहे. अमेरिकेने पश्चिम आशिया प्रदेशातील हस्तक्षेप थांबविल्याशिवाय हा महत्त्वाचा सामुद्रधुनी मार्ग बंदच राहील, असे आयआरजीसीने म्हटले आहे.

आयआरजीसीच्या निवेदनानुसार, “परकीय शक्तींच्या बेकायदेशीर हस्तक्षेपामुळे निर्माण झालेल्या सुरक्षा परिस्थितीच्या पार्श्वभूमीवर” हा निर्णय घेण्यात आला आहे. निवेदनात म्हटले आहे, “होर्मुझ सामुद्रधुनी पुढील आदेशापर्यंत बंद करण्यात आली आहे आणि अमेरिका या प्रदेशातील आपला हस्तक्षेप थांबवत नाही तोपर्यंत ती बंदच राहील. कोणत्याही जहाजाला या सामुद्रधुनीतून प्रवास करण्याची परवानगी दिली जाणार नाही.”

आयआरजीसीच्या नौदलाने होर्मुझ सामुद्रधुनी बंद असल्याच्या परिस्थितीचा बहाणा करून इराणविरुद्ध कोणतीही अतिरिक्त लष्करी कारवाई करण्याचा प्रयत्न केल्यास त्याचे गंभीर परिणाम भोगावे लागतील, असा इशाराही दिला आहे. अशा कोणत्याही कारवाईला कठोर प्रत्युत्तर दिले जाईल, असे निवेदनात स्पष्ट करण्यात आले आहे. निवेदनात पुढे म्हटले आहे, “आक्रमक शत्रूने स्वतः निर्माण केलेल्या या परिस्थितीचा वापर इराणविरुद्ध आणखी एका हल्ल्याचे निमित्त म्हणून करण्याचा प्रयत्न केला, तर त्याला चोख प्रत्युत्तर दिले जाईल. तसेच या प्रदेशातील शत्रूच्या अतिरिक्त तळांनाही लक्ष्य करण्यात येईल.”

वृत्तानुसार, आयआरजीसीने असेही म्हटले आहे की, या परिस्थितीतून उद्भवणाऱ्या कोणत्याही परिणामांची जबाबदारी अमेरिका, इस्रायल आणि इराणविरुद्धच्या कारवायांसाठी वापरल्या जाणाऱ्या लष्करी तळांना आश्रय देणाऱ्या देशांवर असेल. दरम्यान, हा घटनाक्रम अशा वेळी समोर आला आहे, जेव्हा दोन्ही देशांमधील वाढता तणाव कमी करण्यासाठी राजनैतिक स्तरावर संवादाचे प्रयत्न सुरू आहेत.

हे ही वाचा:

पूरीपेक्षाही उंच बांगलादेशातील धामराई रथयात्रेचा रक्तरंजित इतिहास!

व्हिएतनाममध्ये १५ भारतीय पर्यटकांच्या मृत्यूशी लाव्हा मोबाईलचा काय संबंध?

सूरांचा अमर स्वर हरपला; दिग्गज गायिका एस. जानकी यांचे निधन

वाळवंटातला मैलाचा दगड; तेल शुद्ध तुझं, गोष्ट आहे पचपद्राची

यापूर्वी, इराणचे परराष्ट्र मंत्री सय्यद अब्बास अराघची यांनी शनिवारी मस्कत येथे ओमानचे परराष्ट्र मंत्री सय्यद बद्र अल-बुसैदी यांच्याशी चर्चा केली होती. या बैठकीत द्विपक्षीय संबंध अधिक बळकट करणे, प्रादेशिक घडामोडी आणि होर्मुझ सामुद्रधुनीतील सागरी सुरक्षेच्या मुद्द्यांवर विशेष भर देण्यात आला.