भारतातील इस्रायलचे राजदूत रुवेन अझर यांनी, अमेरिका- इराण यांच्यात सुरू असलेल्या शस्त्रसंधी वाटाघाटींमध्ये पाकिस्तानच्या मध्यस्थ भूमिकेवर शंका व्यक्त केली आहे. इस्रायल इस्लामाबादला “विश्वासार्ह भागीदार” मानत नाही, असे ते म्हणाले. अमेरिकेचे उपराष्ट्रपती जे. डी. व्हान्स या आठवड्याच्या अखेरीस दीर्घकालीन करार घडवून आणण्याच्या उद्देशाने मध्यस्थीने होणाऱ्या चर्चेसाठी पाकिस्तानला एका शिष्टमंडळाचे नेतृत्व करणार आहेत.
“आम्ही पाकिस्तानला एक विश्वासार्ह देश मानत नाही,” असे अझर यांनी एएनआय या वृत्तसंस्थेला दिलेल्या मुलाखतीत सांगितले. ते पुढे म्हणाले की, पाकिस्तानसोबत संबंध ठेवण्यामागे वॉशिंग्टनची स्वतःची कारणे असू शकतात, आणि अमेरिकेने स्वतःच्या कारणांसाठी पाकिस्तानच्या मदतीचा वापर करण्याचे ठरवले आहे. उदाहरण देत ते म्हणाले की, अमेरिकेने यापूर्वी हमाससह इतर देशांसोबत करार घडवून आणण्यासाठी “कतार आणि तुर्कीसारख्या समस्याग्रस्त देशांसोबत” काम केले आहे. “आम्हाला अपेक्षित असलेल्या परिणामाचे स्वरूप आणि सार या बाबतीत अमेरिकेशी ताळमेळ राखणे आमच्यासाठी खूप महत्त्वाचे आहे,” असे इस्रायली राजदूत म्हणाले.
अझर यांचे हे वक्तव्य अशा वेळी आले आहे, जेव्हा अमेरिका आणि इराण यांच्यात दोन आठवड्यांच्या शस्त्रसंधीची घोषणा करण्यात आली आहे आणि या आठवड्याच्या अखेरीस दीर्घकालीन करार घडवून आणण्याच्या उद्देशाने मध्यस्थीने चर्चा करण्यासाठी अमेरिकेचे उपराष्ट्रपती जेडी व्हान्स एका शिष्टमंडळाचे नेतृत्व करत पाकिस्तानला जाणार आहेत . शस्त्रसंधीवर बोलताना अझार म्हणाले की, इराणचा अणुकार्यक्रम आणि त्याचे बॅलिस्टिक क्षेपणास्त्र उत्पादन हे “अस्तित्वाचे दोन धोके” दूर होतील, अशी इस्रायलला आशा आहे. ते पुढे म्हणाले की, “इराणच्या राजवटीला कमकुवत करून तेथील जनतेला त्यांचे भविष्य स्वीकारण्याची संधी देणे” हे इस्रायलचे उद्दिष्ट होते, आणि “आम्ही ते साध्य केले आहे,” असे त्यांनी ठामपणे सांगितले.
हे ही वाचा:
इराणला मोठा दिलासा! डोनाल्ड ट्रम्प यांचा ‘नो टॅरिफ्स’चा संकेत
निडर वैभवचा धडाका; पांड्याही झाला फॅन!
सेन्सेक्स तब्बल २,९४६ अंकांनी उसळला, निफ्टी २४,००० च्या उंबरठ्यावर
लष्करी कारवाया आता शिथिल होत असल्याने इस्रायल आपले लक्ष दुसरीकडे वळवत आहे, असे ते म्हणाले. “आता आमची लष्करी कारवाई संपली असल्याने, आम्ही राजनैतिक मार्गाकडे वळत आहोत,” असे ते म्हणाले, पण गरज पडल्यास बळाचा वापर हा एक पर्याय म्हणून कायम राहील, असा इशाराही त्यांनी दिला. “आम्हाला आशा आहे की आम्हाला पुन्हा लष्करी कारवाई करावी लागणार नाही, पण जर इराणी राजवटीने आम्हाला दुसरा कोणताही पर्याय ठेवला नाही, तर आम्ही ते करू.” यापूर्वी इस्रायलचे पंतप्रधान बेंजामिन नेतान्याहू यांनीही असेच मत व्यक्त केले होते.
