अमरावती च्या परतवाडा परिसरात एका १९ वर्षीय तरुणाने अनेक तरुणींचे अश्लील व्हिडिओ रेकॉर्ड करून प्रसारित केल्याने मोठी खळबळ उडाली. या प्रकरणी १९ वर्षीय अयान अहमद तनवीर आणि उजेर खान इक्बाल खान यांना बेड्या ठोकण्यात आल्या आहेत. अयान याने सुमारे १८० मुलींना लक्ष्य करून ३५० हून अधिक व्हिडिओ चित्रित केले. आता पोलिसांच्या तपासादरम्यान एक मोठा खुलासा झाला आहे. ज्या फ्लॅटमध्ये हे घृणास्पद गुन्हे घडल्याचा आरोप आहे, तो फ्लॅट पोलिसांनी शोधून काढला आहे.
पोलिसांच्या तपासानुसार, मुख्य आरोपी अहमद अयान हा अल्पवयीन पीडितांना अमरावतीतील कथोरा नाका परिसरातील एका निवासस्थानाच्या तिसऱ्या मजल्यावरील फ्लॅटमध्ये घेऊन जात असे. याच फ्लॅटमध्ये मुलींचे कथित शोषण करण्यात आले आणि अश्लील व्हिडिओ रेकॉर्ड करण्यात आले. आरोपी अयान प्रत्येक वेळी फ्लॅट वापरण्यासाठी एका मित्राला ५०० रुपये देत असल्याची धक्कादायक माहितीही समोर आली आहे. पोलिसांनी या प्रकरणी कारवाई करत फ्लॅट मालक आणि आरोपीच्या मित्राला अटक केली आहे.
तपासात असे उघड झाले आहे की, या फ्लॅटमध्ये मुलींना वारंवार आणले जात होते. पोलिसांच्या एका पथकाने बुधवारी घटनास्थळी जाऊन फ्लॅटची पाहणी केली आणि अनेक महत्त्वाचे पुरावे गोळा केले. अहमद अयान व्यतिरिक्त या गुन्ह्यात आणखी कोण सामील होते आणि हा एखाद्या मोठ्या नेटवर्कचा भाग होता का, हे निश्चित करण्यासाठी पोलीस सध्या सखोल तपास करत आहेत. पोलिसांनी सांगितले की, तपास सुरू असून सर्व बाबींचा विचार करून पुढील कारवाई केली जाईल.
हे ही वाचा:
निजामकालीन दागिन्यांचे आमिष दाखवून घातला ५० कोटींचा गंडा
“मूल हवे असल्यास पत्नीला पाठव” नाशिक कॉर्पोरेट जिहाद प्रकरणातून धक्कादायक खुलासे
इराण तणावात अमेरिकेने महागडा MQ-4C ट्रायटन ड्रोन गमावला
भारतीय रेल्वेचे ब्रिटन, रशिया, चीनपेक्षा जास्त विद्युतीकरण
प्रकरण काय?
परतवाडा येथील अयान अहमद तनवीर (वय १९) याने अनेक मुलींशी जवळीक साधून त्यांचे आक्षेपार्ह व्हिडीओ आणि फोटो काढले होते. हे व्हिडीओ अयानचा मित्र उजेर खान इक्बाल खान याने सोशल मीडियावर व्हायरल केले. गेल्या तीन दिवसांपासून हे व्हिडीओ व्हायरल झाल्याने संतापाचे वातावरण निर्माण झाले होते. या प्रकरणात आणखी कोणाचा हात आहे का, याचा शोध घेण्यासाठी पोलिसांनी तपासाची गती वाढवली आहे. तसेच आरोपींचे मोबाईल जप्त केले असून सर्व पुरावे फॉरेन्सिक लॅबला पाठवण्यात येत आहेत. सोशल मीडियावरून हे व्हिडिओ हटवण्यासाठी संबंधित कंपन्यांशी पत्रव्यवहार करण्यात आला आहे. पीडितांच्या कुटुंबीयांनी न घाबरता महिला अधिकाऱ्यांशी संपर्क साधावा, त्यांची ओळख गुप्त ठेवली जाईल, असे आवाहन पोलिसांकडून करण्यात आले आहे.
