गुजरातकडे जाणाऱ्या थायलंडच्या मालवाहू जहाजावर होर्मुझच्या सामुद्रधुनीत हल्ला

पश्चिम आशियातील संघर्ष शिगेला पोहचलेला असून याचा परिणाम समुद्री व्यापारावर झाला आहे. अशातच ओमानजवळ एका जहाजावर मिसाईल हल्ला झाल्यामुळे खळबळ उडाली आहे. बुधवारी गुजरातकडे जाणाऱ्या एका थायलंडच्या ध्वजधारी मालवाहू जहाजाला होर्मुझच्या सामुद्रधुनीत एका अज्ञात मिसाईलने धडक दिली. यामुळे जहाजात आग लागली. यानंतर तातडीने बचाव कार्य सुरू झाले ज्यामध्ये २० क्रू सदस्यांना बाहेर काढण्यात आले, तर तीन जण जहाजातच आहेत.

सागरी सुरक्षा सूत्रांनी आणि जहाज ट्रॅकिंग डेटानुसार, मयुरी नरी असे ओळखल्या जाणाऱ्या या जहाजाला ओमानच्या उत्तर किनाऱ्यापासून सुमारे ११ नॉटिकल मैल अंतरावर लक्ष्य करण्यात आले. या घटनेनंतर २० क्रू मेंबर्सना वाचवण्यात आले, तर तीन क्रू मेंबर्स अजूनही जहाजावर असल्याची पुष्टी थायलंड सरकारने केली आहे. रॉयल थाई नेव्ही आणि युनायटेड किंग्डम मेरीटाईम ट्रेड ऑपरेशन्स या दोघांनीही ११ मार्च रोजी होर्मुझच्या सामुद्रधुनीत एका मालवाहू जहाजाला अज्ञात प्रक्षेपणाने धडक दिल्याचे वृत्त दिले.

फोटो आणि सागरी नोंदींवरून जहाजाची ओळख थाई ध्वजांकित बल्क वाहक मयुरी नारी असल्याचे सिद्ध झाले. जहाजाच्या आंतरराष्ट्रीय सागरी संघटनेच्या क्रमांकाद्वारे तसेच जहाजाच्या हल आणि सुपरस्ट्रक्चरद्वारे पडताळणी करण्यात आली, जी जहाजाच्या संग्रहित प्रतिमांशी जुळली. सागरी नोंदींनुसार, हे जहाज प्रेशियस शिपिंगच्या मालकीचे आहे. या मिसाईल हल्ल्यानंतर जहाजाला आग लागली. काही वेळात आग आटोक्यात आणण्यात आली. माहितीनुसार, ओमानी नौदलाने या भागात बचाव मोहीम सुरू केली आणि जहाजातील २३ क्रू मेंबर्सपैकी २० जणांना बाहेर काढले. बाहेर काढल्यानंतरही तीन क्रू मेंबर्स जहाजावरच राहिले. अधिकाऱ्यांनी अद्याप त्यांच्या स्थितीबद्दल किंवा जहाजाचे किती नुकसान झाले आहे याबद्दल तपशील उघड केलेले नाहीत.

हे ही वाचा:

“जाणूनबुजून तणाव निर्माण करणारी काँग्रेसची विधाने”

“सरकारी पक्षाचा खटला ठोस, ग्राह्य पुराव्यांवर आधारित नाही!”

मायक्रोसॉफ्ट एनथ्रोपिकच्या मदतीला; ट्रम्प प्रशासनाविरुद्ध खटला

“मोजतबाला सर्वोच्च नेता बनवू नका!” अली खामेनी यांच्या मृत्युपत्रात काय लिहिले आहे?

सागरी ट्रॅकिंग सिस्टीममधील डेटावरून पुष्टी झाली की ही घटना ओमानच्या उत्तर किनाऱ्याजवळ जगातील सर्वात महत्त्वाच्या शिपिंग मार्गांपैकी एक असलेल्या होर्मुझच्या सामुद्रधुनीत घडली. ११ मार्च रोजी जहाजाची शेवटची नोंद झालेली स्थिती अशी होती की हल्ल्याच्या वेळी ते ओमानच्या किनारपट्टीपासून सुमारे ११ नॉटिकल मैल अंतरावर होते. हल्ल्यात वापरण्यात आलेल्या शस्त्राची अद्याप अधिकृत ओळख पटलेली नाही. अद्याप कोणत्याही गटाने किंवा देशाने जबाबदारी स्वीकारलेली नाही.