आयपीएल २०२६ मध्ये धोनी सर्व सामने खेळणार?

चेन्नई सुपर किंग्स (सीएसके)चे सीईओ कासी विश्वनाथन यांनी सांगितले की, संघाचे माजी कर्णधार महेंद्रसिंग धोनी आयपीएल २०२६ मध्ये सर्व सामने खेळू शकतात. मात्र त्यांची नेमकी भूमिका काय असेल याचा अंतिम निर्णय टीम मॅनेजमेंट घेईल.

सीएसकेचे सीईओ कासी विश्वनाथन म्हणाले, “माझ्या मते धोनी या हंगामातील सर्व सामने खेळतील.”

धोनी पुढील हंगामात विकेटकीपिंगही करणार का, असा प्रश्न विचारण्यात आला असता त्यांनी सांगितले,
“हे मी आत्ताच सांगू शकत नाही. हा पूर्णपणे क्रिकेटचा निर्णय आहे आणि तो क्रिकेट स्टाफ घेईल, प्रशासनिक स्टाफ नाही. त्यामुळे धोनी फलंदाज म्हणून खेळतील, विकेटकीपर-फलंदाज म्हणून की इम्पॅक्ट प्लेअर म्हणून, हे तेच ठरवतील.”

दरम्यान, सीएसकेने संजू सॅमसनला संघात स्थान दिले आहे. त्यामुळे संजू सॅमसन मैदानात विकेटकीपर म्हणून दिसण्याची शक्यता व्यक्त केली जात आहे.

सीएसके सीईओंनी टी-२० विश्वचषक २०२६ जिंकण्यात महत्त्वाची भूमिका बजावणाऱ्या सीएसकेच्या संजू सॅमसन आणि शिवम दुबे यांचेही कौतुक केले.

ते म्हणाले,
“भारताने सलग दोन वेळा टी-२० विश्वचषक जिंकला याचा आम्हाला खूप आनंद आहे. त्यातही आमच्या सीएसकेचे दोन खेळाडू संजू आणि शिवम दुबे यांनी उत्कृष्ट कामगिरी केली. त्यामुळे आम्हाला संघाबद्दल अधिक आत्मविश्वास वाटतो की ते आयपीएलमध्येही चांगली कामगिरी करतील.”

आयपीएल २०२६ ची सुरुवात २८ मार्चपासून होणार आहे. सर्व १० संघांनी आगामी हंगामासाठी तयारी सुरू केली आहे. नुकत्याच संपलेल्या टी-२० विश्वचषकात सहभागी झालेले खेळाडू लवकरच आपल्या-आपल्या फ्रँचायझींमध्ये सहभागी होणार आहेत.

संघाच्या सरावाबद्दल विचारले असता त्यांनी सांगितले,
“सराव व्यवस्थित सुरू आहे. आतापर्यंत कोणतीही अडचण आलेली नाही.”

दरम्यान, आयपीएल २०२६ चे अधिकृत वेळापत्रक गुरुवारी जाहीर होण्याची शक्यता आहे.