उत्तर प्रदेशात भाजपकडून राज्यसभेसाठी नव्या चेहऱ्यांना संधी

उत्तर प्रदेशातील आगामी राज्यसभा निवडणुकीसाठी भाजपने सोमवारी आठ उमेदवारांची घोषणा केली. विशेष म्हणजे, केंद्रीय पेट्रोलियम आणि नैसर्गिक वायूमंत्री हरदीप सिंह पुरी यांच्यासह राज्यसभेतील विद्यमान आठही भाजप खासदारांना यावेळी पुन्हा उमेदवारी देण्यात आलेली नाही. भाजपने उत्तर प्रदेशातून धर्मपाल सिंह, राधाकांत ओझा, प्रकाश पाल, विद्यासागर सोनकर, गोपी कृष्ण पांडे, प्रियंका सिंह रावत, राम प्रताप सिंह चौहान आणि श्रुती गंगवार यांना राज्यसभेसाठी उमेदवारी दिली आहे.

नव्या यादीत सामाजिक समीकरणांवरही भर देण्यात आला आहे. आठ उमेदवारांमध्ये तीन ओबीसी, दोन अनुसूचित जाती आणि तीन सर्वसाधारण प्रवर्गातील नेत्यांचा समावेश आहे. ओबीसी प्रवर्गातील उमेदवारांमध्ये लोढी, पाल आणि कुर्मी समाजाचे प्रतिनिधित्व आहे. हरदीप सिंह पुरी यांच्यासोबतच बी. एल. वर्मा, अरुण सिंह, सीमा द्विवेदी, नीरज शेखर, बृजलाल आणि गीता शाक्य यांनाही नव्या यादीत स्थान मिळालेले नाही. भाजपचे माजी राज्यसभा खासदार दिनेश शर्मा सध्या अंदमान आणि निकोबार बेटांचे नायब राज्यपाल असल्याने त्यांचे नावही या यादीत नाही.

उत्तर प्रदेशातील १० राज्यसभा जागांसाठी १६ ऑक्टोबरला निवडणूक होणार आहे. त्यापैकी सध्या आठ जागा भाजपकडे आहेत, तर समाजवादी पक्ष आणि बहुजन समाज पक्षाकडे प्रत्येकी एक जागा आहे. भाजपने यावेळी आठ जागांसाठी उमेदवार जाहीर केले आहेत. भाजपची ही उमेदवार यादी २०२७च्या उत्तर प्रदेश विधानसभा निवडणुकीच्या पार्श्वभूमीवर महत्त्वाची मानली जात आहे. नव्या यादीत जातीय प्रतिनिधित्वासोबतच पक्ष संघटनेतील अनुभव आणि प्रादेशिक संतुलनाला स्थान देण्यात आल्याचे वृत्त आहे.

हे ही वाचा:

मुंबईत नऊ महिन्यांत ७२,८०४ घरांची विक्री

१५ वर्षांत १०० अब्ज डॉलर गुंतवणूक, १० लाख रोजगार

भ्रष्टाचाराच्या आरोपांवर मुख्यमंत्री मान यांच्या सहाय्यकाची सीबीआय चौकशी

रशियात ‘प्लेग’ची भीती? लॅब संशोधकाच्या मृत्यूनंतर २०० जण क्वारंटाइन

भाजपने प्रादेशिक संतुलनही राखले आहे: धर्मपाल सिंह आणि राम प्रताप चौहान हे पश्चिम उत्तर प्रदेश आणि ब्रज भागातील आहेत, तर श्रुती गंगवार रोहिलखंडच्या आहेत. गोपी कृष्ण पांडे आणि विद्यासागर सोनकर हे पूर्वांचलचे; प्रकाश पाल कानपूर-बुंदेलखंड प्रदेशातून आलेले आहेत आणि राधाकांत ओझा हे प्रयागराज भागातील आहेत. संख्याबळाच्या आधारावर भाजपच्या आठही उमेदवारांचा विजय निश्चित मानला जातो. त्याचप्रमाणे, समाजवादी पक्षाचे दोन उमेदवार – रामगोपाल यादव आणि धनराज परिमल नथवाणी – यांचाही विजय निश्चित आहे.